'Bizi gogoz' programaren urteko lehen jarduerak aurkeztu dituzte
Ekainera bitarte, adinekoek harremanak sendotzeko, sormena sustatzeko eta ongizatea bultzatzeko hainbat jarduera egingo dituzte Palmera Monteron.
Bueltan dira Bizi gogoz programako urteko lehen jarduerak. Programa honek 60 urtetik gorakoen harremanak sendotzeko, sormena bultzatzeko eta ongizate fisikoa eta mentala sustatzeko balio du. Horretarako, doako hainbat jarduera aurkeztu dituzte, ekainera bitarte egingo direnak. 2024an sortu zuten, eta ordutik adinekoei zuzendutako askotariko jarduerak egin dituzte. Bizi gogoz-ek aukera ematen die adinekoen espazioetatik kanpo, urte osoan zehar, doako jarduerak antolatzea. Iaz 60 urtetik gorako 265 pertsonak hartu zuten parte.
Dagoeneko aurkeztu dituzte Palmera Monteron egingo dituzten urteko lehenengo jarduerak. Bazen behin nire bizitza idazketa autobiografirako tailerra bi astelehenetik behin antolatuko dute, martxoaren 2tik abenduaren 14ra bitarte. Itziar Sistiaga irakaslea izango da, eta adinekoek aukera izango dute nork bere bizitzaren liburua idazteko, denbora-lerro batetik abiaturik. Saioek bi orduko iraupena izango dute, 17:00etatik 19:00etara.
+60 ART Emakume artistak: Ruth Asawa tailerrak askotariko korronte artistikoak eta artista esanguratsuak azalduko ditu. Junkal Alfonsoren gidaritzapean, arte plastikoan murgilduko dira. Saioak martxoko astearteetan iznago dira, 17:00etatik 19:00etara. Gainera, martxoaren 26an, ostegunarekin, Bilboko Guggenheim Museoa bisitatuko dute, zehazki, Ruth Asawaren erakusketa bat bisitatuko dute.
Sexualitateak ere, tokia izango du adinekoen artean. +60 sexualitate tailerra antolatuko dute apirilaren 17an eta ekainaren 12an, bi ostiraletan, 17:00etatik 19:00etara. Raquel Calvo sexologoak kontzeptu teorikoak eta sexualitatearen ikuspegi berriak emateko askotariko edukiak proposatuko dizkie. Helburua kontzeptuak eta sentsazioak ulertzea eta barneratzea izango da.
Ekaina bitarte aurkeztu duten azken tailerra Belaunaldiarteko joskintza pilula: Bizkar-zorroa izango da. Apirilaren 29an, Belaunaldiarteko Elkartasunaren Egunarekin bat eginez, 60 urtetik gorakoek eta gazteek bizkar-zorroa egingo dute. Sonia Ruiperez irakatsiko die ikaskuntza parekatzen, hondakin gutxiago sortzen eta planeta zaintzen. Familiek josteko makinak erabiltzen ikasteko aukera izango dute bi orduko saioan, hain zuzen, 17:30etatik 19:30etara.
Doako tailer hauetan parte hartzeko izena eman beharko dute otsailaren 23tik hasita martxoaren 1era arte, Herritarrentzako Arreta Zerbitzuan edota udalaren webgunean. Uda ondoren, Bizi gogoz programaren udazkeneko tailerrak aurkeztuko dituzte.
