Haurren hazkuntza kontzientea sustatzeko hainbat jarduera egingo dituzte datozen hilabeteotan
Bueltan dira HaurARTEan programako hitzaldiak eta tailerrak, eta Irungo familiek haurren hazkuntzari buruzko jarduerak izango dituzte martxotik maiatzera bitarte.
Haurren hezkuntza emozionala sustatzea ezinbestekoa da hazkuntza osasuntsu, afektibo eta kontziente baterako. Gaur, HaurARTEan programaren hitzaldiak eta tailerrak aurkeztu dituzte. Aurkezpenean, Sandra Caballerok, Hezkuntza eta Gazteriako ordezkariak, jarduera honen garrantzia nabarmendu nahi izan du: “Hitzaldi eta tailer hauen helburua da gurasoei tresna praktiko batzuk eskaintzea, seme-alaben emozioak ulertzeko, haurrei laguntzeko eta egoerak kudeatzeko”. Hitzaldiak eta tailerrak CBAko Kultura eta Sorkuntza zentroan eta Palmera Montero espazioan egingo dituzte, martxoa eta maiatza bitarte. Bi orduko iraupena izango dute tailerrek, 17:30etatik 19:30etara.
Honen helburu nagusia hazkuntza partekatutako komunitatea sortzea da. Horretarako, informazio, dibulgazio eta prestakuntzako jarduerak antolatuko dituzte. Gaiak askotarikoak izango dira: hezkuntza emozionalaren garrantzia, bullyinga detektatzeko eta biktimei lagun egiteko jarraibideak eta 0 eta 6 urte arteko haurren hazkuntzarako gakoak. Gaiak lantzeko hainbat irakasle izango dira tailerretan, hala nola, Mar Romera, adimen emozionaleko aditua; Belen Colomina, psikologoa; eta, Julene Armendariz, pedagogo perinatala.
Dagoeneko, lehenengo tailerren datak argitaratu dituzte. Martxoaren 4ko hitzordua CBAko Kultura eta Sorkuntza Zentroan izango da. Mar Romerak Hezkuntza emozionala eta emozio-eragilea tailerrean haurren emozioen kudeaketa landuko du. “Bizitzan aukeratzeko tresnak izan ditzaten eta beren bertsiorik onena konfiguratu ahal izan dezaten”.
Martxoaren 17an, berriz, Belen Colominak bullyinga izango du hizketagai. Bullynga detektatzeko eta biktimei lagun egiteko jarraibideak tailerrean biktimei indarra emateko, familiak orientatzeko eta hezkuntza munduan inguru seguruagoa eta enpatikoagoa eraikitzeko estrategiak azalduko ditu. Tailer hau CBAko Kultura eta Sorkuntza Zentroan ere egingo dute.
Julene Armendarizek, berriz, Haurrei lagun egiteko gakoak: ez da moda kontua, erantzunak fisiologian daude tailerra irakatsiko die 0 eta 6 urte arteko haurrak dituzten familiei. Tailer honek bi helburu izango ditu. Batetik, familien osasun mentalean eragin positiboa izatea, eta bestetik, prebentzioaren oinarriak ezagutzera ematera. Tailerra bi saioetan egingo dute Palmera Monteron: apirilaren 20an, euskaraz, eta maiatzaren 6an, gaztelaniaz.
Tailerretan parte hartu nahi dutenek udalaren webgunearen bitartez egin beharko dute izen-ematea. Dagoeneko epea ireki dute, eta plaza guztiak bete arte luzatuko dute.
