Indarkeria matxistaren aurkako arreta zerbitzua inauterietan jarriko dute martxan
Urte osoan zehar egongo da erabilgarri, jai giroan egindako ekitaldietan. Erasoen aurrean jarduteaz gain, prebentzioa jorratuko dute.
Udalak indarkeria matxistaren aurkako arreta zerbitzua urte osoan zehar bermatuko du, jai giroan. Aurreko urteetan moduan, udalak arreta puntu bat ahalbidetuko du, informazioa eta artatzea eskainiz. “Neurri honen bidez, Udalak berdintasunean, errespetuan eta askatasunean oinarritutako jai-eredu baten aldeko konpromisoa berretsi nahi du, indarkeria matxistarik gabeko espazio seguruak sustatuz”, adierazi du udalak ohar bidez. Inauterietan jarriko dute martxan.
Hainbat ekitalditan egongo da abian, hala nola Herri Olinpiaden amaieran, Gazte Egunean, Jai Nagusietan eta Fenomena Jaialdian. “Ekitaldi bakoitzaren ezaugarrien arabera, informazio-guneak, artatze-puntu fisikoak eta telefono bidezko arreta eskainiko dira”, adierazi dute. Erasoen aurrean jarduteko ez ezik, prebentziorako eta informazioa emateko balioko dute puntuak eta telefono zerbitzuak.
“Elkarbizitzarako espazioak”
Igor Enparan alkatea hortaz mintzatu da: “Hondarribiko jaiak gozamenerako, errespeturako eta elkarbizitzarako espazio seguruak izatea nahi dugu, pertsona guztiek askatasunez eta lasaitasunez parte har dezaten. Hondarribiko Udalak indarkeria matxistaren aurrean zero tolerantzia du; horregatik, prebentzioa eta arreta uztartzen dituzten baliabideak aktibatuko ditugu data esanguratsuenetan”.
Inauteriei begira, larunbatean telefono zerbitzua emango dute 21:00etatik 08:00etara. Zenbakia: 688 718 797
