HAPOaren aldaketa Via Irunekin aurrera egiteko mugarria
HAPOaren aldaketa otsaileko osoko bilkurara eramango dute, eta ezinbestekoa izango da trenbidearen integrazioa gauzatzeko.
Hirigintza antolamendua adostutako irtenbide tekniko berrira moldatzeko, HAPOaren gaia otsaileko osoko bilkurara eramango dute. Funtsezko beste urrats bat egingo du proiektuak, eta HAPOaren aldaketa puntualaren hasierako onarpena funtsezkoa izango da Via Irunekin aurrera egiteko. Hirigintza antolamendua adostutako irtenbide tekniko berrira moldatzea eta burdinbideak ADIFen gaur egungo trenbide aldean biltzea da helburu nagusia. Atzo egin zuten Plangintzaren Aholkularitza Kontseiluaren aurkezpena.
Aldaketa honek geltoki intermodal berriaren eremuari eragiten dio, hain zuzen, 72.000 metro koadroak gainditzen dituen azalera. Fase berri honetan Trenbidearen Integrazioaren Protokoloa eta topoaren eta ADIFen burdinbide plataforma egingo dute. Honela, topoaren linea lekualdatuko dute egungo burdinbide plataforman sartzeko eta bateratzeko. 2024ko abenduan ADIFen, ETSren eta Irungo Udalaren artean sinatutako Trenbidearen Integrazioaren Protokoloaren baitan dago aldaketa. Urrats hori egin ondoren, Via Irun proiektua fase berri batean sartuko da.
Cristina Laborda alkateak proiektu honen garrantzia nabarmendu du: “Hirigintza mailako urrats berri hau funtsezkoa da Via Irun proiektu handia sendo abiarazteko eta gaur egun erabat hondatuta dagoen eremu hori berroneratzen jarraitu ahal izateko”. Ildo beretik, Gorka Alvarezek, Mantentze eta Azpiegituretako ordezkariak, Aduana eraikina berroneratzea Via Irun proiektuaren bereizgarria izango dela adierazi du. Aduana Zaharraren eraikin nagusiaz gain, ondoko nabeek ere balio historikoa dute. Burdinbide trazadura berriarekin bateragarriak ez diren gainerako eraikinak antolamendutik kanpo geratuko dira.
Jendaurreko informazioa izateko beharrezkoak diren txostenak bilduko dituzte, eta hirigintza esparru bat finkatu eta hirian txertatutako hiri eremu berri bat antolatuko dute. Trenbideen sistema orokor bat erreserbatzen dute topoaren etorkizuneko integrazioa hartzeko, eta lursailak, eraikigarritasunak eta eraikinen profilak berrantolatuko dituzte eskema berriarekin bat egiteko. Topoaren trenbide berria lurpean egokituko dute, planteatutako trazadurararen arabera.
Lurperatzearen ondorioz, estalkiaren gainean erabilera publikoko espazioak sortuko dituzte. HAPOak eraikuntza egitura malgua planteatzen du, hainbat solairu izango ditu eta eremua hiri premien eta premia ekonomikoen arabera garatuko dute.
Azken batean, HAPOaren fase berri honen helburua geltokiaren inguruan hiriaren bi ertzak lotuko dituen erdigunea sortzea da. Hiri Barruti Berritzailean bizitegi erabilerak, erabilera ekonomikoak eta zuzkidurako erabilerak uztartuko ditu. Katea eta Plaiaundi lotuko dituen bide berdea ere proiektuaren parte da, oinezkoen eta txirrindularien mugikortasun hobea ahalbidetuko du.
