PSE-EEk herriko hainbat emakume elkarte Berdintasun Mahaitik kanpo gelditu direla salatu du
"Alardeari buruzko irizpide propioa, eta, aldi berean desberdina" duten elkarteen baztertzea salatu dute.
Pasaden astean egin zuten lehen Berdintasun Mahaiko saioa, udal taldeei zuzenduta. Bertan Alardea izan zen gai nagusia. PSE-EEk adierazi du bigarren berdintasun planerako hainbat zuzenketa aurkeztu dituela, eta Berdintasun Mahaiak parte hartze handiagoa, zabalagoa eta pluralagoa izatea eskatu dutela. “Aniztasun hori ez da gertatu, izan ere, emakume-kolektibo batzuk ez dira mahai horretako kide izateko deitu, Hondarribiko emakumeen elkarte-sarearen zati handi bat kanpoan utzita”, esan dute ohar bidez.
Sozialisten ustez, Abotsanitzek eta EH Bilduk ez dituzte oposizioan zeudenean babesten zituzten neurriak errespetatu. “2022ko urrian, Abotsanitzek proposatuta, EH Bilduk babestutako Berdintasun politika gauzatzeko proposamena mozioa aurkeztu zen. Mozio horren lehenengo puntuan berariaz adierazten zen Berdintasun Mahaia sortzeko borondatea, parte-hartze anitza eta zabala bermatuz”. Orain, udal gobernuari lehenago defendatutako neurri horiek errespetatzea eskatu diote sozialistek.
“Salbuespenik gabe”
PSE-EEren ustez, “onartezina” da Berdintasun Mahaia sortzerakoan, “Alardeari buruzko irizpide propioa, eta, aldi berean desberdina” duten elkarteak kanpoan uztea. “Gure ustez, irizpide horrekin kanpo geratzen dira aldekoak ez diren eta jarrera horrekin bat ez datozen emakume-elkarte guztiak. Berdintasunaren defentsa udal talde sozialistak defendatzen duen eta defendatuko duen aldarrikapen bat da, Hondarribiko emakumeen elkarte guztiak barne. Salbuespenik gabe. Eta euren jarreren defentsa topagune eta elkarrizketa gune batean egin behar da”.
Hori denagatik, sozialistek Berdintasun Mahaira ez joateko erabakia hartu zuten.
