Udal taldeei bidegorria "arma politikotzat" ez erabiltzea eskatu die Balaztak
Pasaden asteetan, eskualdeko alderdi politikoek Plaiaundi eta Mendelu lotuko lituzkeen bidegorria jarri dute mahai gainean berriro ere.
Pasaden asteetan, Hondarribiko eta Irungo EAJ taldeek hainbat adierazpen egin dituzte Plaiaundi eta Mendelu lotuko lituzkeen bidegorriari buruz, Espainiako Gobernuari obrak hastea eskatuz. Horren harira mintzatu dira Balazta elkarteko kideak. Badira urteak Balaztak Irun eta Hondarribi lotuko litukeen bidegorria eskatzen duela, eta orain, adierazi dute bidegorria ezin dela udal taldeen arteko arma politiko gisa erabili.
Balaztak esan du udal taldeen interesa benetakoa bada, “proposamen batu baten inguruan beste administrazioekin (Foru Aldundia, Eusko Jaurlaritza eta Gobernu Zentrala) batera lan egiten ahalik eta lasterren” jar daitezela. Oinezkoen eta txirrindularien mugikortasunerako eta segurtasunerako pausu oso garrantzitsua da bi herrien lotura elkartearen ustez, eta horren borrokan jarraitzeko xedea erakutsi dute.
“Gure ustez, bidegorria ezin da erabili, eta ez da erabili behar, eztabaida politikorako arma jaurtitzaile gisa”, azaldu du bizikletaren aldeko elkarteak. Orain arte, alderdiek konpondu ezin izan duten arazoa da elkarteak planteatzen duena, beraz, hori bera aldatzeko asmoa erakustea eskatu diete politikariei.
