Oiasson antzerkiaz eta musikaz gozatzeko aukera izango dute
Urteroko antzerki tailerrez gain, ostegun honetan, hilaren 12an, Irungo Udal Musika Eskola eta Kontserbatorioko ikasleek kontzertua eskainiko dute Oiasson.
Oiasso museoa ez da soilik erakusketen bilgune, antzerkiak eta musikak urteko programazioan ere bere lekutxoa dute. Ohikoa denez, Tania Martin Fornieles aktore eta irakasleak antzerki tailerrak antolatuko ditu Oiasson. 2021an hasi zen egitasmoa Gipuzkoako Foru Aldundiaren babesarekin. Antzerki tailerrak bederatzi saio izango ditu aurten, eta tailer honen helburu nagusia uztailean antolatuko duten Dies Oiassonis jaialdirako emanaldi txikia prestatzea da. Dagoeneko izena emateko epea irekita dago, 45 euroan.
Tailer hauen bitartez, antzezpen tekniketan murgiltzeko eta testu greko-latindarren talde irakurketak egiteko aukera izango dute interesdunek. Saio hauek antzerki klasiko greko-erromatarra ezagutzera ematen dute, aldi berean, jendea sorkuntza eta kultur arloko jardueretan parte hartzea bultzatu nahi dute. Saioak datozen ostegunetan izango dira: otsailaren 19an eta 26an; martxoaren 5ean, 12an eta 26an; apirilaren 16an, 23an eta 30ean; eta maiatzaren 7an. Saio guztiek ordubete eta erdiko iraupena izango dute, 18:00etatik 19:30etara.
Ohiko erakusketak eta antzerki tailerrak gutxi balira, musikazaleek ere museora gerturatzeko plan bikaina izango dute ostegun honetan, hilaren 12an. Irungo Udal Musika Eskola eta Kontserbatorioko ikasleek kontzertua eskainiko dute, Borja Rubiños irakasle eta piano jotzailearen laguntza izango dute. Ikasleen 2026ko lehenengo kontzertua izango da, eta Musika Museoan programa inauguratuko du. Sarrera doakoa izango da, tokiak bete arte.
