Kaldereroak eta inude eta artzainak inauteriei hasiera emateko
Inauterien atarian, jardueraz beteriko asteburua izango dute hiritarrek, eta bi desfileez gain, Trikipoteoa eta Diana Berezia egingo dute.
Eraiki Dantza Taldeko inude eta artzainen desfilea.Eraiki Dantza Taldea Astebete falta da inauterietarako, eta Irungo hiritarrak festa gogoz daude. Kaldereroek hasiera emango diote jaiaz beteriko hilabeteari larunbat honetan, hilaren 7an. Irungo Atsegiña elkarteak urteko hitzordua izango du, eta Alberto Anguera plazatik abiatuta San Juan plazarainoko desfilea egingo dute. Arratsaldeko giroa pizteko Alde Zaharreko kaleetan Trikipoteoa egingo dute. Euskal Jirak antolatuta, kaleak animatuko dituzte 12:00etatik aurrera.
Festak igandean jarraipena izango du. Goizean goizetik, Irungo Txistulari Taldeak Diana Berezia eskainiko du, 08:30ean. Inauteriekin zerikusia duten doinuak hiritarren iratzargailu doinuak izango dira, eta inude eta artzainen desfilea ikustera joateko deia egingo diete. 12:00etan, puntu-puntuan, Santiago kaletik hasiera emango diote Eraiki Dantza Taldeko kideek desfileari. Hiriko erdiguneko kaleak zeharkatuko dituzte dantzariek, Jostailu eta Gauerdi txarangek, Atsegiñako sukaldariek eta Ondare Elkarteko lau erraldoiek. Guztira 250 parte hartzaile bilduko dira desfilean, inoizko jendetsuena izango da. Desfilearen bukaerako ekitaldia Zabaltza plazan izango da, eta bertan Irungo Kontserbatorioko musikariekin batera XIX. mendeko garaiko ekitaldia antzeztuko dute.
Pasa den ostiralean, HITZAk inude eta artzainen erreportajea ondu zuen. Eraiki Dantza Taldeko kide den Ane Etxeparek urteotako errepasoa eta desfilearen nondik norakoak azaldu zituen.
Udalak herritarrei gogorarazi nahi die Zanpantzarraren irudia denboran zehar erakusketa eta aurtengo ediziorako aurkeztutako inauterietako kartelen erakusketa ikusgai egongo dira Amaia KZn. Otsailaren 17ra arte interesdunek aukera izango dute bi erakusketak ikusteko, sarrera doakoa da.
