Koldo Rodriguez Akarregik zinegotzi kargua utzi du
EH Bilduko zinegotzia izandakoak bere kargua utzi du urtarrileko Osoko Bilkuran, eta Karlos Gebarak hartuko du koalizio abertzalean gelditutako hutsunea.
Rodriguez, ezkerraldean, Garoa Lekuonarekin batera. Bi urte eta erdi eman ditu Koldo Rodriguez Akarregik Hondarribiko udal gobernuko kide moduan. Dimisioa aurkeztu du, eta horrenbestez, kargua alde batera utzi, “arrazoi profesional eta pertsonalak direla medio”. Atzoko Osoko Bilkuran iragarri zuen bere erabakia, eta EH Bildutik adierazi dute hautetsi berria, Karlos Gebara berehala hasiko dela lanean.
HITZAri bidalitako gutun pertsonalean Rodriguezek idatzi du ez dela bide erraza izan, baina pertsona apartak izan dituela bere alboan. “Ez da bide erraza izan zinegotzi izatearena, azken urte hauetan denetatik entzun («marikoi zikina alde zure herrira!») eta bizi behar izan ditut. Azkena, 2025eko irailaren 7an Hondarribiko EAJko jarraitzaile baten eraso saiakera. Baina honek guztiak merezi izan duelakoan nago, gauzak ondo egin direnaren seinale baitira”. Eskerrak eman nahi izan ditu zinegotzi ohiak, hala nola “Manzari, Isasiri, Txabiri, Iñigori, Maiteri, Kimari, Loreri, Marijori, Joxerrari, eta noski, Garoari”. Horrez gain, Abotsanitzi ere eskerrak eman nahi izan dizkio, “aldaketaren aldeko apustu horretan elkarrekin” egiten dabiltzan lan horregatik guztiagatik.
Amaitzeko, dei egin nahi izan die herritarrei: “Duela hiru urte aldaketaren aldeko apustua egin zenuten eta apustu honen alde egiten jarraitzeko deia egin nahi dizuet. Herriak merezi du. Ez eraman berriro herri hau iluntasunera”.
