Ur-zerbitzuaren fakturek tarifa egitura berria izango dute 2026an
Fakturak kontsumoaren araberako fakturazio sisteman oinarrituta egongo dira, eta otsailean herritarrek ur-kontsumoaren urteko lehen fakturak jasoko dituzte.
Otsailari dagokion uraren eta hondakinen faktura gaur ordainduko dute ordain-agiria helbideratuta duten erabiltzaileek. Otsailean urtarrileko ur-kontsumoaren fakturak jasoko dituzte herritarrek, eta 2026ko fakturek berritasun bat izango dute. Ur-kontsumoaren fakturek tarifa egitura berria izango dute iragarri du Txinzerrek. Fakturak kontsumoaren araberako fakturazio sisteman oinarrituta egongo dira, eta bakoitzaren kontsumo ohiturak zehaztasun handiagoz islatuko ditu.
Orain arte, kontsumitutako metro kubiko guztiak prezio berean fakturatzen ziren. Hemendik aurrera, uraren kostua egindako kontsumoaren arabera aldatuko da, eta egitura berri honek uraren erabilera egiten dutenak argiago identifikatzeko aukera ematen du. Hitz gutxitan azalduta, kontsumo eraginkorrentzat prezio baxuak ezarriko dituzte, eta kontsumo handientzat, berriz, prezioak progresiboki handiagoak izango dira.
Onartutako ereduak hiru kontsumo tarte ezartzen ditu. Lehen tartea kontsumo eraginkorrei lotuta dago, bigarrena ohiko kontsumoei dagokie, eta hirugarren tartea, aldiz, kontsumo handientzat izango da. Horrez gain, ordenantza berriak tarifa espezifikoak eta bereziak jasotzen ditu: familia ugarientzat, etxeko tarifa berezia nahi dutenentzat eta abeltzaintza/nekazaritzako tarifak. Hauei %50eko murrizketa aplikatuko zaie, baina aldez aurretik tarifa berezi horien eskaera egin beharko dute Txinzerren webgunean edo bezeroen arretarako bulegoan.
Kontsumoa ezagutzeko hainbat azterketa egin dituzte, eta Bidasoa Behereko etxebizitzetan bataz beste hiru pertsonatik behera bizi dira. 90 litroko kontsumo eraginkorra egiten dutela gutxi gorabehera, kontsumo arduratsua duten etxeentzat tarifa berriaren eragina txikia izango dela ziurtatu du Txinzerrek.
Edozein zalantza argitzeko edota informazioa jasotzeko Txinzerrek herritarren eskura jartzen ditu harremanetarako ohiko kanalak.
