Txingudiko Elkarte Feministak Bidean proiektua martxan jarri du
Genero indarkeria pairatu duten emakumeei laguntza eta akonpainamendu integraleko espazioa da, eta Emma Larretak sustatu du proiektua.
Txingudiko Elkarte Feministak berdintasunaren aldeko lanean jarraitzen du. Bidean proiektua genero-indarkeria egoerak bizi izan dituzten emakumeei zuzendutako akonpainamendu integraleko espazioa izango da. Emma Larretak sustatuko du proiektua, eta berreskuratze integrala eta birgizarteratze kontzientea ardatz dituen metodologia baten bidez garatuko du. Saioetan dinamika indibidualak eta taldekoak, solasaldiak eta topaketak uztartuko dira.
Gipuzkoako Foru Aldundiak babestutako proiektuak ehun sozialak sortzean eta elkarren arteko babesean du oinarria. Helburua isolamendua apurtzea, konfiantza berreskuratzea eta taldearen indarra balioan jartzea da. Espazio seguru eta zaindua izango da, emakume bakoitzaren autonomia pertsonala berreraikitzen laguntzeko. Honek ikuspegi komunitario eta feministatik indartzea ahalbidetzen du.
Proiektu berri honen bitartez, Txingudiko Elkarte Feministak indarkeria matxistaren aurrean prozesuetan oinarritutako arreta-ereduarekiko konpromisoa indartzen du, eta akonpainamendurako espazio egonkorrak sustatuko ditu.
