La Oreja de Van Gogh, ABBA eta Gozategi Psilocyben izan zirenekoa
Bertsio Gaba egin zuten larunbatean Psilocybenean. Bederatzi talde izan ziren oholtzan, musika estilo ezberdinak interpretatzen.
Chile hABBAnero taldea. Egin dute berriro. Bertsio Gaba arrakastatsua izan da aurten ere, ezin hobea. Bederatzi talde izan ziren oholtzan, eta denetariko musika izan zen Psilocybenean. Jende gazte asko ikusi zen Amutale 12ko aretoan, eta herriko eta inguruetako biztanleek bete zuten gaua.
LD talderekin ireki zuten gaua, 20:00etan. Ondoren, Bread Moon taldeak Dead Moon-en bertsioak jo zituen, aretoa jada gainezka zegoenean. Gauak aurrera jarraitu zuen, eta aretoan kontzertuak zeuden bitartean, barra eremuan Ramon Zabalegik eta Cristina Juanizek mural bat osatu zuten. “Sarrera doakoa da beti Bertsio Gabean, baina borondatea eskatzen dugu. Horrelako gauzak antolatzea oso polita da, baina lan asko du atzetik”, adierazi du Psilocybeko kide batek. Dantzaegarri taldeak hainbat bertsio egin zituen, izenak dioen moduan, dantzatzeko. Black Sabbathen bertsioak egin zituen Zapatu Beltzak, eta ondoren, areto guztia dantzan jarri zen Aupa Orio taldearekin. Gozategiren kantak jo zituzten, noski, horiz jantzita.
Euskal rockaren momentua izan zen Aupa Orioren ondoren.: Piperrada eta K-Ostikoka, hau da, Piperrak eta Kaos Etiliko. Askok nabaritu zuten moduan, hainbat musikarik taldeak errepikatu zituzten, instrumentuak aldatuz edo noizean behin mikrofonoa hartuz. Horren harira, aski nabaritu zen baten batek aspalditik ez zuela gitarra hartu, baina gogoak beti irabazten dio jakinduriari.
Azken emanaldiak
Azken bi taldeek musikaz gain, ikuskizuna eskaini zuten. ABBAko mozorroekin igo ziren Chile hABBAneroko taldekideak oholtzara, eta talde suediarraren kanten erritmoa kutsatu zien bertaratutakoei. Backstagera itzuli, arropaz aldatu, eta berriro igo ziren, baina bigarrengoan mariatxiz, haien kantak interpretatuz. Azkenik, La Oreja de Van Gogh taldearen kantak jo zituzten, Leire Martinezekin eta Amaia Monterorekin. Bien arteko liskarra irudikatu zuten.
Talde guztiez gain, bi protagonista handi izan ziren oholtzan: Alaska eta Mario. Bi aurkezleek, bikote madrildarra irudikatuz aurkeztu zituzten talde guztiak. Gainera, amaieran, sariak banatu zituzten.
- postua: La Oreja de Van Gogh
- postua: Chile hABBAnero
- postua: Aupa Orio!
