PSE-EEk udal gobernuaren "marketin politikoa" salatu du
Udal gobernuak egindako legealdiko lehenengo bi urteen balantzearen aurka agertu dira sozialistak.
Aurreko astean, Abotsanitzek eta EH Bilduk osaturiko udal gobernuak legealdiko lehen bi urteen balantzea egin zuten. Balantze horretan, iragarri zuten legealdirako prestatutako neurrien %82a bete zitutela edo betetzeko prozesuan zegoela. PSE-EEk, aldiz, adierazi du udal gobernuaren agintaldi plana “kontraesankorra eta baztertzailea” dela.
Sozialistek uste dute udal gobernuaren agintaldi plana marketin politikorako bideratuta dagoela, eta ez duela proiektu finkatu bat eskaintzen. “Udal gobernuak adierazi du planaren % 82 bete duela edo martxan jarri duela. Udal Talde Sozialistak zalantzan jarri du kopuru hori, ez baita gauza bera martxan izatea eta betetzea”, adierazi dute. Horretarako, adibideetaz baliatu dira: “Adibide garbia 2024ko aurrekontuaren likidazioa da; izan ere, gobernuak %90a gauzatu zela adierazi zuen, benetako betetze-maila % 67koa izan zenean, eta inbertsio errealak %45era ozta-ozta iritsi zirenean”.
PSEko kideek adierazi dute plan baztertzailea dela. “Ez da gauza bera herritar batzuentzat edo guztientzat lan egitea, proposamen baztertzaileekin eta, kasu batzuetan, errespetu instituzionalik gabe”.
Gobernantzaren eta parte-hartzearen arloan, “zenbait aurrerapen puntual egin diren arren”, PSE-EEk salatu du beste eremu batzuetan atzerakada argia izan dela, hala nola Mendeluko Mahaia desagertu egin dela edo elkarteekin bilerak nabarmen murriztu direla. “Bereziki larria da, sozialisten iritziz, berdintasun-politiken kudeaketa; izan ere, irizpide baztertzaileak ezartzen dira, emakumeen kolektiboek Berdintasun Mahaian parte hartzea eragozten dutenak, arrazoi ideologikoengatik”.
“Erabaki arduragabeak”
HAPOari begira, sozialisten ustez, Abotsanitzek bere printzipioak urratu ditu, EAJren plana jaso eta onartu egin baitute, oposizioan zeudenean gogor kritikatu arren. Horrez gain, adierazi dute etxebizitzaren arloan, gune tentsionatu izendatzeko prozesua geldiune batean dagoela.
Badira jorratu ez diren premisak sozialisten ustez, hala nola udal kiroldegiaren egoera eta kudeaketa. Badira ere “erabaki arduragabeak” direnak, terrazen ordenantza bezala. Laburbilduz, PSE-EEk “herritar guztien interes orokorrean oinarritutako hiri-eredua defendatzen jarraitzeko xedea” erakutsi du, haien ustez, udal gobernuak “ez baitu hiri proiektu finkaturik, soilik irudi estrategia bat”.
