Kupelak husten hasi dira Ola sagardotegian
Txotx irekiera egin dute, Bidasoako Erraldoien eskutik. Sagardoa, janaria, bertsoak, trikitiak... denetarik izan da egun handian.
Bidasoako Erraldoietako hiru kide, Eider Bengoetxearekin batera. Ttxotx! entzun da Meakan. Ireki dira Ola sagardotegiko kupelak, eta husten hasi dira. Sagardo berria estreinatu zuten atzo Olan, 2026ko txotx irekieran. 240 pertsona elkartu ziren Meaka auzoko sagardotegian, urtero moduan, sagardotegi denboraldiari hasiera emateko, eta giro ederra sortzeko. “Batzuk mikatzagoak, besteak gozoagoak, baina nire ustez, denak onak”, esan zuen bertaratutako batek. Denboraldi luzea dute aurretik, lan kargaz betea.
Eguerdian ireki zituen ateak sagardotegiko tabernak, 12:00etan. Jendez betetzen hasi zen, pixkanaka, eta kroketak, txorizoak eta sagardo edalontziak nonahi ikusi ziren. Jendearen artean, baziren txamarra gorriz jantzitakoak, helduak eta haurrak, begiradan ilusio berezi bat nabaritzen zitzaienak. Bidasoako Erraldoien kideak ziren, eta haiek izan zuten txotxa irekitzeko aukera. Urtero, hiriko pertsona edo kolektibo bati ematen dio aukera Olak. Gogo handiz ireki zuten txotxa Bidasoako Erraldoiek, Enekoitz Urtxegi dantzariak agurra eskaini ondoren. Eider Bengoetxea Ola sagardotegiko arduradunarekin batera ireki zuten lehenengo kupela.
Orduan hasi zen festa. Anjel Mari Peñagarikano eta Aitor Mendiluze bertsolariek bertso bana bota, eta erraldoiek haien ikuskizuna eskaini zuten. Sagardotegi barruan sartu zituzten erraldoiak, tamaina guztietakoak, eta musika jarriz, dantzan jarri ziren. Bertaratutakoen txalo zaparradak eman zuen ikuskizunaren amaiera, eta albo batera utzi zituzten erraldoiak, txotx-ak egiteko lekua utziz. “Ez genuen espero horrelakorik. Oso ikusgarria izan da erraldoiak hemen barruan dantzan ikustea”, azaldu du bazkaltzera hurbildu zen batek.
Jan eta edan
Bazkaria, betikoa, ederra. Txorizoa, bakailao tortilla, bakailaoa, txuleta, gazta, irasagarra eta intxaurrak. Jende askok errepikatuko du menu hori hurrengo hilabeteetan, baina gogoz hartu zuten lehena. Bitartean, kupelak martxan zabiltzan. Baziren jana alde batera utzi eta mahaian eseri ez zirenak ere. Ohikoa den bezala, postrea baino lehen, trikitilariak jotzen hasi ziren, eta haien atzetik ilara luze bat eginez, kanpoko kupelera hurbildu ziren. Bertan, Ola sagardotegiko kanpoaldean, Peñagarikanok eta Mendiluzek bertsoak eskaini zituzten.
Arratsaldea aurrera zijoala, bertso emanaldi osoa eman zuten bertsolariek, eta puntuka aritzen amaitu zuten. Baina eguna ez zen hor amaitu. Kanpoko frontoian, erromeria egin zuten, eta trikitilarien doinuekin jarri zen jendea dantzan.
Pozez atera zen jendea sagardotegitik. 26 urte beteko ditu Olak aurten, baina luzerako du, jada belaunaldi berrien esku gelditu da eta. Sagardozaleen poztasuna Bengoetxea familiarenarekin batera uztartu zen, eta egun handiaren ondoren, bakoitzak bere etxera egin zuen buelta. Lan handia dute aurretik Olako langileek, Bidasoko sagardotegi bakarra da eta.
Hona hemen atzo HITZAk ateratako argazkiak:
