Anaka kaleko azken eraikina eraitsi dute
Udalak 9,3 milioi euro inbertitu ditu eremua prestatzeko, liberatzeko eta aurreikusitako sustapen guztiak hasteko.
Cristina Laborda alkateak eta Idoia Yarza Irunviko gerenteak eraisketa-lanak bisitatu dituzte.Irungo Udala San Migel-Anakako eremu berriaren urbanizazio-lanak hasteko gutxi falta da. Gaur, hilaren 19a, Anaka kaleko azken eraikinaren eraisketa hasi da. 9,3 milioi euroko inbertsioa egin du Udalak, eremua prestatzeko, liberatzeko eta lanak hasteko. Azken eraisketak bukatzen dituztenean San Migel-Anaka eremuko lanak hasiko direla baieztatu du Cristina Laborda alkateak.
Urtarrilaren 9an hasi, eta ordutik eraisketa-lanak egiten, zoruak deskusatzen, eta bestelako lanak egiten aritu dira. 2008an onetsitako Hiri-antolamenduko Plan Bereziak eraisketa gehiago aurreikusi zituen. Baina 2016an Planaren Aldaketa behin betiko onetsi ondoren, eraitsi behar ziren eraikin horietako asko sendotu egin ziren. Urte hauetan zehar, hainbat eraikin eraitsi behar izan dituzte, hala nola, CONATEC fabrika, Aguerre Txiki eta Santa Barbara eraikinak. Bakarrik Sancheski fabrika eraistea geratuko litzateke, baina horretarako, industria-aurriko espedientea lortu behar du udalak. Azken eraisketa horrek ez du urbanizazio-lanen hasiera atzeratuko.
Irungo historian egin den etxebizitza publikoen sustapenik handiena da. “Bi hamarkada baino gehiagoko prozesu honi amaiera emango diogu, esku-hartzeez, izapideez eta erabakiez jositakoa”, adierazi du alkateak. Guztira 887 etxebizitza publiko eraikiko dituzte, eta egungo etxebizitza babestuen kopurua bikoiztuko dute.
Anaka eta San Migel auzoak lotuko ditu proiektu berriak. Horretarako, oinezkoentzako guneek, plazek, bidegorriek eta bestelako ekipamenduek hiriaren mendebaldeko zonaldea eraldatuko dute, eta denbora luzeegian izandako hutsunea beteko dute.
