Osakidetzak ez ditu osasun-arreta hobetzeko promesak bete
Osasun Bidasoak eskualdearen pediatria larrialdi zerbitzuaren egoera salatu du, urtebete geroago adostutako promesak ez dira bete.
ESI Bidasoa Osasun Bidasoa elkarteak eskualdeko ospitaleko egoera berriro ere salatu du. Osakidetzak egindako promesak ez ditu bete, eta pediatria larrialdiak itxi eta urtebetera hobekuntzak ez direla egon adierazi du elkarteak. Haurrei zuzendutako arreta hobetuko zuela agindu zuen Osakidetzak, baina egoera larria dela diote. Iazko maiatzean Irunen egindako mobilizazioan 12.000 pertsona inguruk parte hartu zuten, eta herritarren ezinegona argia izan zen. Osakidetzaren erantzunik eza jendaurrean agerian uzteko laster mobilizazio gehiago deituko ditu herritar plataformak.
Ospitaleko pediatriako larrialdien itxiera iragarri zenean, pediatria arreta hobetzea agindu zuten. Egungo egoera agindutakoaren oso bestelakoa da. Plazak murriztu dituzte, ez dituzte 08:00tatik 17:00tara ordutegia bermatzen askotan, Irun Zentroko larrialdietan ez daude pediatrarik, eta maiatzetik irailera arte pediatria gehienak falta ziren. Alegia, oraindik ere, pediatrek emandako 24 orduko eta astean zazpi eguneko larrialdi-arreta ez da berrezarri.
Itxaron-zerrenda luzeak
Itxaron-zerrenden egoerak ere ez du hobekuntzarik izan, luzeak izaten jarraitzen dute. Herritar plataformak erabiltzaileek izan dezaketen ziurgabetasuna salatu du. Lehen astero ematen zitzaien informazioa medikuei atzerapenak informatzeko; orain, ordea, noizean behin bakarrik ematen da informazio hori.
Espezialista kontsultetarako itxaron zerrenden murrizketa iragarri zuten iazko abenduan. 56 egunekoa zen. Osasun Bidasoak espezialitate gehienek egun horiek baino askoz gehiago gainditzen dituztela dio. Hainbat alorretan hutsune ugari ditu betetzeke Osakidetzak: urologiarako ez dira hitzorduak programatzen, ekografiak ez dira hitzartzen, minaren unitateak ez du modu erregularrean funtzionatzen, besteak beste.
Agindutako eraikuntza-lanen esperoan
Eskualdeko ospitaleko azpiegituretan milioika euroko inbertsioa iragarri zituzten. Ez dituzte bete oraindik. Ebakuntza gela berrien eraikuntza lanak ez dira hasi, eta ospitaleak urtebete baino gehiago darama bigarren solairuko ospitaleratze-unitaterik gabe. Irun Zentroko lau kontsulta 2020ko uztailetik kanpoko barrakoietan mantentzen dira, eta horrek herritarrei arreta duinagoa eskaintzea galarazten die.
Oinaurreko anbulatorio berriaren eta Irun Zentrorako Bidasoa Institutuko patioko eraikin berriaren proiektuak geldirik daude. Oinaurrekoaren kasuan, oraindik ez da proiektu berria ezagutzen, ezta zer zerbitzu eskainiko dituen ere.
Gaur egungo egoera Osakidetzaren kudeaketa txarraren ondorio zuzena dela dio Osasun Bidasoak. Egoera hobetzeko Osakidetzako zuzendaritza-taldea berritzea eskatzen dute.
