Emakumearen Astea iragartzeko kartel lehiaketa, abian
Martxoaren 8aren harira Hondarribian egingo direnak iragartzeko kartel lehiaketa abiatu dute Berdintasun Sailak eta Emekik.
Martxoaren 8aren inguruan, Emakumeen Egunaren harira, Emakumeen Astea egingo dute Hondarribian. Hori iragartzeko kartel bila ari dira. Hartara, Hondarribiko Udaleko Berdintasun Sailak eta Emeki elkarteak elkarlanean jardueren berri emango duen kartela egiteko lehiaketa antolatu dute. Kartel proposamenak hilaren 30era arte entrega daitezke BAZ bulegoan (Javier Ugarte kalea, 6), udalaren zerbitzu telematikotik, edo posta elektronikoz.
Baldintza jakin batzuk bete behar dituzte kartel proposamenak egin nahi dituztenek. Hasteko eta behin, egile bakoitzak kartel bakarra aurkeztu ahal izango du; proposamen horiek bakarka zein taldeka aurkez daitezke, baina antolatzaileek garbi azaldu dute adimen artifizialarekin sortuak direnak ez dituztela onartuko. Nola ez, lanek Martxoaren 8arekin izan behar dute harremana, eta 2026ko Martxoaren 8a-Emakumeen Nazioarteko Eguna leloa idatzia izan behar dute.
Aurkeztuko diren lan guztiak epaimahai batek aztertuko ditu, eta hura arduratuko da irabazlea aukeratzeaz: 450 euroko saria izango da epaimahaikideen ustez onena izan den kartelarentzat. Gainera, lehiaketarako entregatu diren lan guztiekin erakusketa jarriko da herrian, zehazki martxoaren 2tik 8ra Arma Plaza Interpretazio Zentroan.
Oinarrien berri zehatz izan nahi duenak balia dezala esteka hau.
