Irungo zenbait igogailu publikoren garbiketa berezia egingo dute
Guztira hiriko sei igogailu garbituko dituzte, eta ohiko mantentze-lanez harago doazen esku-hartze gehigarriak egingo dituzte.
Obra, Mantentze Lan eta Azpiegitura arloak bide publikoko zenbait igogailu publikoren garbiketa berezia egingo dutela iragarri du. Barneko eta kanpoko egiturak garbituko dira. Ohiko mantentze-lanez haragoko garbiketa lan bereziak izango dira, aldian behin egin behar izaten dituztenak. Guztira sei igogailu izango dira: Dario de Regoyos kalekoa, Iñigo de Loiola kalekoa, San Juan plazakoa, Gaztainondo kalekoa, Luis Mariano kalekoa eta Colon Pasealekuan Agirre gozotegiaren parekoa.
Instalazioak behar bezala mantentzeko eta zikinkeria pilaketak saihesteko hilabete bateko epean egingo dituzte garbiketa-lanak. Horrela, funtzionamendu segurua bermatzeaz gain, hiriaren itxura zaintzen duten elementuak egoki kontserbatuko dira. Eguneko garbiketa lanak izango dira, eta egun horietan igogailua ez da erabilgarri egongo.
