Ukimena izango da zentzumen tailerren bigarren blokearen protagonista
Egitasmoa 4 eta 8 urte bitarteko haurrentzat da, eta lau larunbatetan egingo dira tailerrak 10:00etatik 13:00etara Kateako haurtxokoan.
GazteARTEanek bost zentzumenak lantzeko haurrentzako tailerra antolatu du. Inaugurazio-saioan ikusmena landu zuten, eta saioak izandako arrakastaren ondoren, ukimena lantzeko bigarren blokea egingo dute. Tailerrak doakoak izango dira, eta urtarrilaren 17n, 24n eta 31n eta otsailaren 7an izango dira. Goizean izango dira, 10:00etatik 13:00etara Kateako haurtxokoan.
Egitasmoa 4 eta 8 urte bitarteko haurrentzat da, eta ukimena lantzeko hainbat jarduera egingo dituzte. Bigarren bloke honetan hainbat jolas, sormen-tailer eta sukaldaritza-jarduera egingo dira ukimen-sentsibilitatea sustatzeko.
Haurrek zirkuitu sentsorial batean parte hartu ahal izango dute. Slime tailerra egiteko aukera izango dute testurak lantzeko; baita pizza goxoak prestatzeko aukera ere. Sukaldaritzaren bitartez, elikagaien manipulazioa eta osagaien oratzea landuko dute.
Doakoak izan arren, izena ematea ezinbestekoa izango da. Epea bihartik, hilaren 9tik, 14ra bitarte izango da, plazak agortu arte. Udal webgunearen bitartez formalizatu ahal izango da, eta nabarmendu nahi izan dute izena lau tailerren bloke osorako ematen dela. Hortaz, saio guztietara joateko konpromisoa hartu beharko dute izena ematen dutenek, ikaskuntzaren jarraitutasuna eta programaren garapen egokia bermatzeko.
Ondorengo tailerrak dastamenari (otsaila eta martxoa bitarte Txikilaben) eta usaimenari (martxoa-apirila Lapitzen) lotuta izango dira. Azkenik, ikasturte osoko zikloari amaiera emateko entzumena landu beharko dute San Migelen, maiatza eta ekaina artean.
