'Romeo eta Julieta' antzezlanaren berrinterpretazioa, Amaia KZn
Obra mitikoaren modernizazioa dakarren 'R&J' antzezlan garaikidea ostiral honetan egingo dute Amaia KZn, 19:30ean.
Romeo eta Julieta obra ospetsuaren berrinterpretazioaz gozatzeko aukera izango dute irundarrek. R&J antzezlan garaikideak Shakespearen maitasun tragikoaren eta orainaldiko loturen arteko elkarrizketa bat jasotzen du. La Dramatica Errante konpainiak obra mitikoaren modernizazioa antzeztuko du ostiral honetan, hilaren 9an, Amaia KZn, 19:30ean. Maitasuna izango dute abiapuntu, eta egungo ikuspegi aske, garaikide eta zirraragarretik landuko dute obra.
Berrinterpretazio honek hiri, kultura eta espazio anitzetara garamatza, istorioa testuinguru berri batean kokatuko duena. Shakespearen esentzia galdu gabe, aro modernoaren erronka eta dinamika sozialak islatuko dituzte, emozioen arintasuna, sare sozialak eta maitatzeko modu ugari dauden garaiotan.
Sarrerak udalaren webgunean, Luis Marianoko turismo bulegoan eta Amaia KZren leihatilan eros daitezke 16,45 euroan. Gazteek, langabezian daudenek eta familia ugariek deskontua izango dute.
