Abeltzainen sindikatuek manifestazioa deitu dute urtarrilaren 15erako
ENBAk, EHNEk eta Nafarroako Abeltzain Elkarteak dermatosis nodularraren aurkako txertoak bere osotasunean jartzea galdegingo dute.
Jaizkibelgo labarretan, behiak. Abereen osasuna jokoan dagoen garai honetan, abeltzainek kezka larria dute euren behiek jasan ditzaketen ondorioak direla eta. Dermatosis nodularra puri-purian dago behien artean, eta gaitza geldiarazteko bere osotasunean txertoak jartzea eskatzen dute. Orain arte zonalde jakinetan bakarrik txertoak baimendu dira. Frantzian sekulako gorakada izan du dermatosis nodularrak, eta horren aurrean irtenbidea eskatzen dute abeltzainek. Egoera salatzeko hurrengo asteko ostegunean, hilaren 15ean, manifestaziora deitu dute sindikatuek Irunen, Behobian.
Frantziako Estatutik gertuen dagoen euskal lurraldea Gipuzkoa da, eta bertako abeltzainek kezka handia dute. Hala ere, abeltzainen sindikatuek kontrol zorrotzagoak eskatzeaz gain, Bizkaian eta Araban ere txertoak jartzea eskatzen dute.
Dermatosis nodularra A mailako gaixotasun larria da. Kasu bat antzeman ezean, behi talde osoaren hustutzea egitera behartuta daude abeltzainak, alegia, behiak hiltzea. Horregatik, abeltzaintzara zuzendutako diru laguntzak eskatzen dituzte, hustutze egoeratan abeltzainek laguntza izan dezaten.
Honen aurrean, Europako Batasun Kontseiluak neurri zorrotzagoak har ditzan eskatzen dute, baita aldi baterako Frantziako abereen sartzea debekatu ere. Manifestazioa deitzeko bigarren arrazoi nagusia Europar Batasunak eta Mercosurrek sinatuko duten ituna izan da: “Abeltzaintzarako oso kaltegarria da”.
