Jarduerez betetako urte berria adinekoentzat
Urtarrila jarduerez beteta egongo da, eta inauteriak ate joka direlarik data horien harira hainbat jarduera egingo dituzte.
Urtarrilak 31 egun baditu ere, adinekoek hamaika jarduera izango dituzte hilabete honetan. Urteari sasoiz helduko diote, eta ia egunero aukera izango dute mota guztietako jarduerez gozatzeko, bihartik hasita hilaren 31era arte. Gizarte Ongizate arloak, hiriko adinekoen espazioak dinamizatzeko zerbitzuaren bidez, jarduera ugari antolatu ditu adinekoen espazioetan.
Eguberriek jarraipena izango dute 2026ko lehenengo hilabeteko jardueretan, eta auzo guztietara zabalduko dituzte jarduerak. Filmak, tailerrak, irakurketa saioak… denetarik izango dute. Gainera, aurtengo inauteriak ohi baino goizago izanik, inauteriei ere zeharka begiratzen hasiko dira. Honekin batera, dantza entsaioak eta inauteritarako apaingarrien esku-lanak egingo dituzte hainbat egunetan.
