Hiri-autobusaren tarifak arautzeko ordenantza eta tokiko merkataritza sustatzeko neurriak onartu dira
Zerbitzu publikoak eta tokiko ekonomia indartzera bideratzeko hainbat erabaki estrategiko eztabaidatu dituzte 2025eko azken ohiko osoko bilkuran.
Hondarribiko Udalak onartutako lan eskaintza publikoak gauzatzeko galdegin dio Abotsaniztek EAJren Udal Gobernuari. Hondarribiko Udalbatzak 2025eko azken ohiko osoko bilkuran hainbat erabaki estrategiko hartu ditu, udalerriko zerbitzu publikoak eta tokiko ekonomia indartzera bideratuak. Besteak beste, aho batez onartu da hiri-autobus zerbitzuaren tarifak arautuko dituen ordenantzaren hasierako onarpena, zerbitzuaren kudeaketa, ordainketa-sistema eta erabiltzaileen eskubideak zehazteko helburuz. Ordenantzaren bidez, Udalak hiri-garraio publikoa modu egonkor eta jasangarrian finantzatu nahi du, ingurumenarekiko erantzukizuna, irisgarritasuna eta jasangarritasun ekonomikoa uztartuz.
Udalak azpimarratu du ordenantza hau eta Gipuzkoako Garraioaren Lurralde Agintaritzan (ATTG) sartzeko prozesua funtsezkoak direla hiri-autobus zerbitzua martxan jartzeko. Aurreikuspenen arabera, udalak datozen egunetan onartuko du ATTGn sartzea, eta horri esker udalerriko hiri-garraioa Gipuzkoa osoko sarearean integratuko da MUGI sistemaren bidez, txartel bakarra eta tarifa bateratua erabiliz. Hiri-autobusaren kontratua dagoeneko sinatuta dago, eta Udala azken urratsak ematen ari da zerbitzua ahalik eta lasterren abian jartzeko.
Tarifei dagokienez, bidaia arruntaren prezioa 1,45 eurokoa izango da txartelik gabe, eta MUGI txartelarekin deskontu nabarmenak aurreikusten dira, bai txartel anonimoan bai pertsonalizatuan, baita 15 eta 25 urte bitarteko gazteentzat ere. Gainera, MUGI sistemak hobari bereziak eskaintzen dizkie hainbat kolektibori, hala nola adinekoei, desgaitasuna duten pertsonei edo egoera ahulean daudenei.
Bestalde, Udalbatzak behin-behinean onartu ditu tokiko merkataritza sustatzeko Hondarribiko bonoak programaren dirulaguntzen oinarri espezifikoak. Programa hori hiriko merkataritza-biziberritzeko planaren barruan kokatzen da, eta aurreko edizioetan jasotako hobekuntzak txertatu dira. Ekimenaren bidez, herritar bakoitzak gehienez hiru bonu erabili ahal izango ditu, gutxienez 30 euroko erosketetan, kanpainari atxikitako establezimenduetan, eta bonu bakoitza denda desberdin batean erabili beharko da. Bonuen kanpaina 2026ko martxotik apirilera bitartean gauzatzea aurreikusten da.
Azkenik, aho batez onartu da Irungo Udalarekin lankidetza-hitzarmen berria sinatzea, Bidasoa eskualdean gizarte-bazterkeria egoeran edo arriskuan dauden pertsonei zuzendutako eguneko arreta eta gaueko harrera zerbitzuak bermatzen jarraitzeko. Hitzarmena 2026ko urtarrilaren 1etik 2029ko abenduaren 31ra bitarte egongo da indarrean, eta Hondarribiko Udalak zerbitzu horien finantzaketaren %20 bere gain hartuko du, aurreko urteetan bezala.
