Euskara, Euskal Jaiak eta Olinpiadak
Euskara proba egin zuten larunbatean, hizkuntzaren eta euskal folklorearen hainbat arlo jorratuz. Tximista taldea izan zen garailea.
Larunbatean burutu zuten Hondarribiko Olinpiaden bigarren jardunaldia. Oraingoan, euskara izan zuten oinarri, euskara proba lehiatu zuten eta. Euskal Jaien harira Hondarribiko Udalarekin elkarlanean aritu dira gazteak, eta haien aletxoa gehituz, hizkuntzaren eta euskal folklorearen hainbat arlo jorratu zituzten. Beti ere, Olinpiaden kutsuarekin. Sei taldetan banatu ziren taldeak, sei liga osatuz, haien artean lehiatzeko xedearekin.
Guztira zazpi proba edo joko egin zituen talde bakoitzak. Lehenengo proba euskal musikaren ingurukoa izan zen. Abestiak asmatzeko joko batekin lehiatu ziren taldeak, Itxaropena tabernaren ondoan. Bigarren proba herri kiroletatik ekarritakoa izan zen: lokotxak. Baina lokotx bakoitzak esaera zahar baten zati bat zuen. Lokotxak jaso, eta haien artean ordenatu zituzten. Hirugarren proban, hitz gurutzatuak egin zituzten, Maddalen Arte Gunearen eremuan. Euskal gastronomia zuten oinarri hitz gurutzatuek. Laugarren proban, zazpi zapi jolasa EGAko atariko probekin uztartu zuten.
17:00etan hasi ziren, eta 19:00ak arte ibili ziren puntuz puntu probak burutuz. Bosgarren proban, talde bakoitzak bost ordezkari aukeratu behar zituen, eta ordezkari bakoitzari gai bat eman. Historia, kultura, literatura, iparralde eta hieroglifikoak izan ziren aurkeztutako gaiak. Gai bakoitzean galdera sorta bat egin zitzaien. Azkenik, seigarren proban, irrintzia egin behar izan zuen talde bakoitzak.
Bertsoak balkoitik
Zazpigarren proba bereziena izan zen. Bertsolaritzak pisu handia izan zuen Euskal Jaietan, eta lehenago Lore Jokoetan, eta hori jakinda, bertsolaritza proba txertatu zuten antolatzaileek. Talde bakoitzak bere bertsoa osatu zuen, joku bakoitzean lortutako argibideekin. Azkenean, hiru bertso onenak aukeratu zituen hiru bertsolarik osatutako epaimahaiak, eta hiru horiek San Pedro kaleko balkoi batetik abestu ziren.
Sailkapena eman zuten azkenekoz. Tximista taldeak irabazi zuen larunbateko proba. Bigarren postuan Amonan Txikhotia ezarri zen, eta hirugarrenean Atletik Klub Txiplau. Irungo Txintxarri txarangak girotu zuen Portua auzoa jokoen ondoren, eta taberna olinpikoetan jarraitu zuten partaideek.
Hurrengo hitzordua urtarrilaren 25ean izango dute, igande goizean. Ondare proba gauzatuko dute.
