Ribera bekarako proiektuak aurkezteko epea, zabalik
Bi pertsonako taldeek mugaren eta lurraldeko memoria historikoaren gaineko proposamenak aurkez ditzakete beka eskuratu ahal izateko.
Aurkeztuko diren proposamenek mugarekin, Bidasoa ibaiarekin edo lurraldearekin izan behar dute harremana. Ribera bekaren prozesua abiatu du Irungo Udalak. Bekaren helburua da biko taldeetan ikerketa prozesu bat garatzeko proposamenak aurkeztu, eta aukeratuak diren proiektuak garatzea betiere mugaren eta lurraldeko memoria historikoaren gaineko gaiak landuz; Bidasoa ibaiarekin eta haren eremuarekin lotura duten gaiak ere jorra daitezke. Bikote bakoitzaren partaideek perfil bana izan behar dute: batek proposatutako lanaren alde artistikoa landu behar du, eta besteak gizarte-zientzien arloko ikerketa garatu behar du, biek ala biek egindakoak harreman zuzena izan behar duelarik. Proposamenak aurkeztuko epea zabalik da, 2026ko urtarrilaren 20era arte.
Deialdiarekin bat egin nahi dutenek landu nahi duten egitasmoaren memoria labur bat edo aurreproiektua, ikus-entzunezkoen materiala, kronograma bat, proiektu edo proposamen artistikoen memoria bat, eta motibazio gutun bat aurkeztu behar dituzte beka prozesurako onartuak izan daitezen. Epaimahaiak hautatuko duen proiektua (edo proiektuak) 11.250 laguntza izango du garatu ahal izateko.
Epaimahaikideek oinarrietan adierazitako irizpideen arabera baloratuko dituzte proposamenak. Horien artean daude, besteak beste, proposamenaren kalitate orokorra, tandemek edo bikoteek artearen eta ikerketaren arloan duten ibilbidea eta esperientzia, eta proiektuaren planteamendu orokorrean genero-ikuspegia eta intersekzionalitatea txertatzea.
Deialdiaren oinarri zehatzak Irungo Udalaren webgunean kontsulta daitezke.
