Emakumeen Etxearen nondik norakoak ezagutzeko aukera, ostiralean
Larreaundi-Olaberria Auzo Elkartean izango da hitzordua, 18:30ean. Ekitaldian zehar Ana Eguiazabalek bakarrizketa bat egingo du.
Emakumeen Etxea Irungo auzoetan lelopean, Emakumeen Etxea zer den eta zer egiten duen ezagutzeko aukera izango da ostiral honetan (hilak 21). Irungo Udalak eta Irungo Emakumeen Etxea elkarteak sinatutako hitzarmenaren barruan antolatutako jarduera da, eta Larreaundi-Olaberria Auzo Elkartean izango da aurtengo azken hitzordua, 18:30ean.
Bizilagun guztiei zuzendutako jarduera da, eta elebitan izango dela aurreratu dute. Hitzordu horretan herritarrei jakinaraziko zaie haien eskura zein jarduera eta zerbitzu dituzten; tartean, gainera, Ana Eguiazabalek bakarrizketa bat egingo du.
Behin eman beharreko xehetasunak emanda, bertaratutakoek Emakumeen Etxearen inguruko zalantzak argitzeko eta proposamenak helarazteko aukera izango dute.
