IX. Greziar Jardunaldiak, hilaren 22an
Aurtengo zikloak hiru jarduera izango ditu, den-denak Oiasso Museoan. Santa Zezilia eguna denez, Greziako musika garaikidea goratuko dute.
Periplo elkarteak, Irungo Udalarekin elkarlanean, IX. Greziar Jardunaldiak antolatu ditu Oiasso Museoan. Aurtengo topaketa hilaren 22an (larunbatarekin) izango da, eta hiru jarduerarekin eraiki dute programazioa. Hilaren 22a Santa Zezilia eguna denez, musikarien zaindaria, Greziako musika garaikideari gorazarre egingo diote Irunen.
Greziako musika garaikidearen panorama izenburupean, Manos Hatzidakis eta Mikis Theodorakis XX. mendeko konpositore heleniar handien jaiotzaren mendeurrena ekarriko dute gogora Oiasson. Horrez gain, larunbateko ekitaldian Foivos Delivorias kantautore greziar ezagunak hartuko du parte. Delivorias bere belaunaldiko artista “ezagun eta maitatuenetako bat” dela adierazi dute sustatzaileek. Delivorias Hatzidakisen ikasle izan zen, eta konpositorearen oinordeko artistikoa da. Bere lanetan sentsibilitate poetikoa eta egungo Greziari buruzko begirada sozial sakona uztartzen dituela jakinarazi dute antolatzaileek.
Larunbateko jarduerak 12:00etan hasiko dira, hitzaldi batekin. Musika greko garaikidea eta bere generoak aztertuko dituzte, eta Greziako musikaren estilo adierazgarrienetan barrena ibilaldi bat egingo dute, Delivoriasen soinudun adibideekin eta iruzkinekin. Sarrera librea da, aretoko edukiera bete arte.
Jarduerek arratsaldean izango dute jarraipena. 19:00etan, Manos Hatzidakis eta Mikis Theodorakis XX. mendeko konpositore heleniar handien bizitzaren eta obren inguruan arituko dira. Bi konpositore horiek Greziako nortasun kultural modernoan “funtsezkoak” izan direla baietsi dute sustatzaileek. Sarrera librea da, aretoko edukiera bete arte. Azkenik, 20:15ean, Foivos Delivoriasek kontzertu akustiko txiki eta intimo bat eskainiko du, gitarra eta ahotsarekin. Kontzertuko sarrerek 6,70 euroko kostua dute, eta Irungo Udalaren webgunean eskura daitezke.
