Kalean "seguruago" ibiltzeko piktogramak margotu dituzte
Oinezkoentzako 45 pasabide egokitu dituzte piktogramekin herritarren "segurtasuna" areagotu asmoz. Diotenez, mugikortasuna "seguru eta inklusiboagoa" izango da.
Irungo Udaleko Obretako, Mantentze Lanetako eta Azpiegituretako Arloak jakinarazi du oinezkoentzako 45 pasabide egokitu dituela piktograma berriei esker “herritarren segurtasuna areagotzeko”. Gorka Alvarez ordezkariak eta Sergio Javier Mugikortasun Jasangarriko ordezkariak eman dituzte xehetasunak Maria Llucia Gil Aurreratu elkarteko fundatzailearekin.
“Gelditu, begiratu, kotxea geldi edo semaforoa berdean dagoen egiaztatu eta gurutzatu” dioten piktogramak sortu dituzte, eta azaldu dute horiei esker mugikortasuna “seguru eta inklusiboagoa” izango dela hirian, “desgaitasun funtzional edo kognitiboren bat dutenei ere egingo baitie mesede”.
Piktograma horiek, besteak beste, hiriko bi anbulatorioen inguruko pasabideetan jarri dituzte, hala nola: Dunboa, Toki Alai, Elatzeta, Belaskoenea, Lekaenea, La Salle Irun, Txingudi, San Vicente de Paul eta Eguzkitza ikastetxeen inguruan, Hizkuntza Eskola Ofizialaren inguruan, Mendibil merkataritza guenaren inguruan eta Caser Residencial Anaka egoitzaren inguruan.
Alvarez: “Obretako, Mantentze Lanetako eta Azpiegituretako Arloak oztopo arkitektonikoak kentzeko kanpainak egiten ditu, baina egitasmo hau berritzailea da, eta harago doa: desgaitasun desberdineko pertsonei laguntzen diegu, eta mugikortasuna seguru eta inklusiboagoa egiten. Pausoa txikia da, baina jende askori lagunduko dio”.
Javier: “Funtsezkoa da gure hirian mugikortasun segurua sustatzea. Udaletik, eta, hain zuzen, Mugikortasun Jasangarriko arlotik, beti saiatzen gara laguntzen duten formula berriak bilatzen, pertsona eta talde kaltebera guztiek gure kaleetan mugikortasun seguru eta inklusiboa izan dezaten. Are gehiago, piktograma horiek modu estrategikoan jarrita, hala nola ikastetxeetatik edo merkataritza guneetatik irtetean”.
Piktogramak urdinak dira, eta oinezkoentzako pasabideetako lehenengo zerrenda zuriaren gainean margotu dituzte. Horretarako, lau arau soil hartu dituzte oinarrian: gelditzea, begiratzea, kotxea geldi dagoen begiratzea eta semaforoa berdean dagoela egiaztatzea eta gurutzatzea.
Finean, kalea gurutzatu nahi dutenak “seguruago” ibiltzea da helburua.
