Prebentzio komunitarioak kontratu berria du 15 urte eta gero
Kontratu berria irailaren 1ean sinatu zen eta urtebeterako iraupena izango duen arren beste urtebete luzatzeko aukera izango du enpresak.
15 urtez iraungita egon ondoren Hondarribiko prebentzio komunitarioaren zerbitzuak kontratu berria izango du. Urtebeteko iraupena izango du kontratuak eta horri esker gazteekin zein komunitate osoarekin egiten den lanak “babes juridiko sendoa” eta “egitura finkoa” izango duela azaldu du udal gobernuak.
Prebentzio komunitarioko kontratua 2009ko apirilaren 30etik iraungita zegoela ikusi zuen udal gobernu berriak kargura iritsi zenean, eta zerbitzuaren jarduerari buruzko azterketa sakon bat egin ondoren egin dute kontratazio prozesua.
Azaldu dutenez, “informazio ezarekin” egin zuten topo eta azterketa egin ondoren zenbait programa garatu gabe edota helburuak bete gabe geratzen zirela ikusi zuten. Informazio hori guztia eskuratzeko urte eta erdi baino gehiago behar izan dutela zehaztu du Lupe Queiruga gazteria arloko zinegotziak.
Informazioa bildutakoan pleguak prestatu eta lehiaketa abiatu zuten. Izaskun Arana Gazteria saileko teknikariak azaldu duenez Hondarribian gaztetatik emozioen kudeaketa, gatazken ebazpena, sexu-heziketa eta harreman osasuntsuen inguruko edukiak “modu integralean” lantzen jarraitzea da udalaren helburua. Enpresa berriak hiru lerroren baitan egingo du lan: prebentzio unibertsala ikastetxeetan, sareen eta komunikabideen bidezko sentsibilizazio kanpainak eta kale hezitzaileen esku hartzea.
Teknikariak, gainera, honako prozesua ez dela soilik administratiboa izan adierazi du, “hausnarketa estrategiko baten emaitza baizik”. Izan ere, prebentzio komunitarioa gazteen garapen osasuntsurako “funtsezkoa” dela iritzi du eta hori eskaini ahal izateko egitura “sendo” baten beharra zegoela” argi du teknikariak.
Kontratu berria irailaren 1ean sinatu zen eta urtebeterako iraupena izango duen arren beste urtebete luzatzeko aukera izango du enpresak.
