Real Union pasealekuko ontziralekua, konponduta eta handituta
25 metro luze ditu pantalan berriak, eta, guztira, 150 metro koadroko azalera du. Inguruko lohiak ere ponpatu dituzte.
Real Union ibilbideko ontziralekua konpondu eta handitzeaz gain, inguruko lohiak ponpatu dituzte berriki. Lanak bertatik bertara ezagutzeko, Irungo Udaleko Obretako, Mantentze Lanetako eta Azpiegituretako ordezkari Gorka Alvarez eta Kiroletako eta Garapen Jasangarriko ordezkari den Borja Olazabalek bisita egin dute.
Jakinarazi dutenez, azkenengoz 2015ean konpondu zuten arraunketa eta piraguismo instalazioei zerbitzu egiteko ontziralekua, eta, orain, aipatu dutenez, konpondu eta urak eramandako eta pantalanaren azpian lohitan jalkitako enbor, makila eta bestelako hondakinak garbitu dituzte, “segurtasun arazoak sortzen baitziren itsasbeheran”.
Alvarez: “Lan horiek eginda, arloak zenbait beharri erantzun die: batetik, Santiagotarrak kirol taldeak ontziraleku handiagoa du orain, eta zerbitzu hobea eman diezaieke taldeko ehunka kirolariei. Bestetik, ibaiaren garapen normala eta kirola orekatzea lortu dugu; azken batean, beharrezkoa zein lohiak ateratzea, ibaiaren berezko garapena eta ontziralekua erabiltzen dutenen segurtasuna bateragarriak izateko”.
Olazabalek, bere aldetik, nabarmendu du “erabat inplikatuta” daudela hiriko kirol taldeei ahalik eta azpiegitura onenak eskaintzeko. “Santiagotarrak talde historikoa da hirian, ontziralekua ahalik eta egoera onenean izatea merezi du, eta egindako lanek hobekuntza nabarmenak ekarriko dizkiote egunerokoan”, amaitu du.
Oraingo pantalanak beste bi modulu ditu, guztira 25 metro luze dituelarik, eta 150 metro koadroko azalera du.
Ontziralekua konpondu eta handitzeko lanak Astilleros Amilibia Untziolak SL enpresak egin ditu 94.276,62 euroko aurrekontuarekin, eta lohiak ponpatzekoak, berriz, Medio Ambiente Residuos y Agua Marea SL enpresak, 127.365,77 euroko partidarekin.
