Gazteen eta familien ongizate emozionala lantzeko saioak
Gipuzkoako Foru Aldundiak gazteen, nerabeen eta familien trebakuntzarako programak abiatu ditu bigarren urtez jarraian. Bost saio egingo dituzte Hondarribian.
Gipuzkoako Foru Aldundiak gazteen, nerabeen eta familien trebakuntzarako programak abiatu zituen iaz. Isaac Palencia Gipuzkoako Foru Aldundiko Gazteriako zuzendari nagusiak azaldu duenez, iaz 400 hitzaldi inguru burutu zituzten lurralde osoan zehar, eta horiei 10etik 9ko babes besteko balorazioa egin zieten parte hartzaileek.
Arrakasta ikusirik, aurten bigarren edizioa jarri dute martxan. Hondarribiko Udalak programarekin bat egin du bigarrenez, eta bost saio egingo dituzte herrian. Horien guztien ardatza bera izango da: Gazte eta nerabeen ongizate emozionala lantzea.
Saioak publiko ezberdinei zuzendurikoak izango dira: gazteei, batetik, eta gurasoei, bestetik. Gazteen kasuan, heldutasunerako bidean lagungarri izango zaizkien tresnak eskaintzeko helburua izango dute saioek. Gurasoek, aldiz, seme-alaben bidelagun izateko tresnak ikasiko dituzte. Saio guztiak euskaraz izango dira eta familiei zuzenduriko saioetan aldi bereko itzulpena eskainiko dute, gaztelaniaz.
Lupe Queiruga Gazteria eta Hezkuntza zinegotziak azaldu duenez, Hondarribian “gero eta interes handiagoa” dagoela ikusi dute gazteen eta familien ongizate emozionala lantzeko. Izan ere, “gurasoek eta nerabeek emozioak kudeatzeko edo harreman osasuntsuak eraikitzeko dituzten erronkak ez dira beti errazak izaten. Horregatik, prestakuntza saio hauek lagungarriak izango dira familian elkar ulertzeko eta gatazkak modu eraikitzailean kudeatzeko”.
Bost saio, bost helburu
Lehen saioa hilaren 14an izango da, 17:30etatik 19:00etara, Kultur Etxeko areto nagusian. Gure emozioak kudeatzen, gure seme alaben bidelagun izateko izenburua izango du, eta familiei zuzenduriko saioa izango da. Bigarrena hilaren 18an izango da. Honakoa Bidasoko zein inguruko herrietako gazteei (17-24 urte) zuzendurikoa izango da eta autoezagutzaren eta ongizate emozionalaren oinarriak ezagutzeko saioa eskainiko dute. Jardunaldi praktikoa izango da eta bertaratzen direnek bazkaria barne izango dute, Hondarribiko Udalaren eskutik. Goizeko 10:30ean hasiko da eta arratsaldeko 17:00ak arte iraungo du.
Hirugarren saioa, berriz, hilaren 21ean egingo dute. Osasun mentala ardatz izango duen familiei zuzendurikoa izango da honakoa. 17:30ean hasiko da eta Kultur Etxeko areto nagusian izango da. Laugarrena ere familiei zuzendurikoa izango da eta bulling egoerak minimizatzeko inguru seguruak nola sortu aztertuko dute bertan. Hitzaldia Kultur Etxean izango da, 17:00etatik 19:00etara.
Azkenik, GAZ Zerbitzuak, Emantzipa Eusko Jaurlaritzaren diru laguntzen informazio saioa eskainiko du. Kultur Etxeko 103 gelan izango da, 18:00etatik 19:00etara. Guztira 25 eserleku egongo dira. Sarrera librea izango da edukiera bete arte.
