7.400 pertsona inguru bildu ditu Irun Zuzenean egitasmoak
Zikloak "amaiera arrakastatsua" izan badu ere, antolatzaileek diote CBAko Kultura eta Sorkuntza zentroko kontzertuen emaitza "ezin hobea" izan dela.
CBAko Artoteka espazioa, inaugurazio egunean. Ximun Leturia Lete Pasa den larunbatean amaitu zen aurtengo Irun Zuzenean zikloa, eta udalaren arabera “amaiera arrakastatsua” izan du 2025eko egitasmoak. Aysha aurretik zuela, Bebek eman zuen kontzertua asteburuan San Juan plazan, eta 6.300 pertsona inguru bertaratu zirela zehaztu dute antolatzaileek. Alabaina, zikloaren hitzordu guztiak batuta, 7.400 pertsona zenbatu dituzte.
Aurtengoan CBAko Kultura eta Sorkuntza zentroan zenbait kontzertu egin dituzte, eta “emaitza ezin hobea” izan dela sinistuta daude antolatzaileek.
Nuria Alzaga, lehenengo alkateordea eta kultura ordezkaria: “Aurtengo balantzea oso positiboa da. Edizio honetarako azken urteetako formatua birformulatu dugu, jaialditik ziklora pasatuz, eta Bebek San Juan plazan emandako kontzertuaren emaitza onak alde batera utzita, Irun Zuzenean aretoan erregistratutako zenbakiek adierazten digute norabide zuzena hartu dugula”.
Egitasmoaren lehen hitzordua hilaren 19an izan zen, eta Belako eta Onavibe taldeek eman zuten kontzertua; 120 lagun inguru bertaratu ziren. Hurrengo egunean, berriz, Los Punsetes eta Slimfit taldeen txanda izan zen, eta zifra bera lortu zutela nabarmendu dute. Handik egun batzuetara Janus Lester musikari beratarren eta Isora bizilagunaren txanda izan zen, eta hitzordu horietara 284 pertsona bertaratu ziren.
Aurtengo zikloaren azken asteburuan Irun Zuzenean aretoan aritu ziren Tulsa eta Santalla, eta horiek 219 sarrera saldu zituzten. Hurrengo egunean Ariel Rot argentinarraren eta Bluehaten txanda izan zen, eta sarrera guztiak saldu zituzten; hots, ia 350.
