Udal administrazioa indartzeko oposaketak egin dituzte gaur
600 lagun inguru bildu dira Irungo Ficoba erakustazokan. 5 administrari lanpostu betetzeko deialdia da. 2024etik 37 langile egonkortu dira.
Hondarribiko Udalak pausu garrantzitsua emango du giza baliabideen alorrean. Izan ere, herritarrei kalitatezko zerbitzu publiko “hurbil eta eraginkor” bat eskaintzeko asmoz, zenbait oposizio-lehiaketa zabaldu ditu. Horiek administrazioa “indartzea eta egituratzea” ahalbidetuko dute.
Alkateak azaldu duenez, urte asko dira udalak ez duela horrelako prozedurarik burutzen. Azken oposaketa deialdiak 2017an egin ziren eta 2000. urtetik hona bi deialdi egin dira soilik.
Aldiz, 2024. urtetik 21 plaza atera dira oposizio-lehiaketa bidez, hau da, 37 langile egonkortu dira azken urtean. Eta aurrerantzean ere etorkizunera begirakoan ere bide honetan sakontzen jarraitzeko nahia adierazi du.
“Udaletxera iritsi ginenean, aldibaterakotasun tasa ia %70ekoa zen eta hori, zalantzarik gabe, arazo bat bezala identifikatu genuen. Europar batasunetik eratorritako agintarau baten bitartez estatuan 2021ean lege berezi bat ezarri zen egonkortze prozesuak martxan jartzeko. Lege berezi bat izan zen eta soilik administrazioan aldi baterako lanean zeuden langileei eragiten zien, eta prozesu horiek burutzea izan zen heldu genuen lehen erronka”.
Orain artean, prozesu horren baitan, 17 prozedura burutu direla nabarmendu du ondoren, eta horien bitartez 37 langile egonkortzea ahalbidetu direla. Prozesu hori “berezia” izan zen eta orain, “ohikotasunean sartuta”, aurten 21 lanpostu karrerako funtzionario bitartez izendatzeko deialdiak zabaldu dituzte. Gainera, datozen asteetan beste deialdi bat zabalduko dutela aurreratu du.
Egonkortze prozesuaren azken fasean sartu berritan, gaur goizean bost administrari lanpostu betetzeko hautaketa prozesuaren lehen azterketa egin da. Guztira 600 lagun aurkeztu dira azterketara. Horiek Ficoban egin dute hitzordua, aurkeztu diren kopurua ikusita ezinezkoa izan zaielako azterketa Hondarribian egitea.
“Biziki pozik nago ikusten dudalako horrelako prozesu bat deitutakoan jendeak ere erantzuten duelako eta hautagai kopuru handia izanagatik, antolakuntza aldetik zenbait zailtasun eragin dizkigula kontuan edukita ere Hondarribiko Udalak erantzun duela”.
Alkateak azaldu duenez, lehen fasea (azterketa orokorra) gainditzen dutenak soilik igaroko dira bigarrenera (azterketa espezifikora). Eta euskara gaitasuna frogatzen ez duten horiek hirugarren bat izango dute.
Egonkortutako postuak
Orain artean 37 langile egonkortu dira. Horien artean, 32 lagunek lehiaketa bidez lortu dute plaza: Kultur teknikari plaza 1, arkeologo plaza 1, arkitekto tekniko plaza 1, euskara saileko arduradun plaza 1, euskara irakasle 4 plaza, gizarte langile plaza 1, delineatzaile plaza 1, agente lehen 4 plaza, udaltzain 12 plaza, administrari plaza 1, administrari laguntzaile 4 plaza, atezain plaza 1.
Eta gainontzekoek lehiaketa oposizio bidez: Administrari plaza 1, udaltzain 5 plaza, ofizial elektrikari plaza 1, administrazio orokorreko teknikari plaza 1, eta gizarte langile plaza 1.
Hautaketa prozesu guztien informazioa udalaren webgunean dago eskuragarri.
