'Kuir soinuak', binarismoarekin haustea proposatzen duen erakusketa
Soinu Labor proiektuaren bidez sortutako erakusketa bat da, eta Idoia Hernandez 'Hatxe' da sortzailea. Gaurtik hilaren 25era egongo da CBAn.
Gaurtik (hilak 9) urriaren 25era arte Kuir Soinuak erakusketa egongo da Irungo CBAko Kultura eta Sorkuntza Zentroan. Idoia Hernandez Hatxe da sortzailea, eta Soinu Labor programaren barruan sortu du erakusketa.
Irungo Udala sortzailearekin jarri zen harremanetan esanaz bertako talde batekin ea soinu eta bitartekotza laborategi bat garatu nahi zuen, eta Hatxek hiriko pertsona talde batekin lan egitea erabaki zuen, genero eta sexualitate kategoria tradizionaletik kanpo identifikatzen direnekin, alegia, esperimentaziorako eta entzuteko espazio seguru bat sortuz.
Zenbait hilabetetan taldekideak soinua hizkuntza sentikor eta politiko gisa ikertzeko bildu ziren, “emozioak, oroitzapenak eta desioak ikertuz, mugak zalantzan jarriz eta adierazpide berriak eraikitzen dituzten praktika artistikoak eraikiz”.
Eta, hala sortu zuten Kuir Soinuak, “minetik, memoriatik, askatasun beharretik eta espazio seguruetan bizitzeko nahitik” sortutako piezak biltzen dituen erakusketa. Azaldu dutenez, obra bakoitzak “binarismoarekin haustea proposatzen du, jariakorra, hautsia eta berreraikia besarkatuz, publikoa epairik gabe entzutera eta egunerokotasunetik arrotzarekin durundi egitera gonbidatuz”.
Erakusketa ikusteko ez da sarrerarik behar, baina kontutan izan behar da ordutegia; astelehen eta igandeetan itxita egoten da, baina asteartetik larunbatera 11:00-14:00 eta 17:00-20:00 egoten da zabalik.
