Carmen B. Mikelarenak bere azken lana aurkeztuko du Irunen
'Pentsamendu magikoaren basoa: sorgin bat nola fabrikatzen den' proiektua izango da madrildarrak aurkeztuko duena. Hilaren 13an izango da.
Carmen B. Mikelarena, Instagrameko irudi batean. @choose_a / Instagram Irungo Udaleko Berdintasun zerbitzuak Bitaminarekin batera Carmen B. Mikelarena ikertzaile eta artistak ondu duen Pentsamendu magikoaren basoa: sorgin bat nola fabrikatzen den proiektua aurkeztuko du. Sortzaileak berak egingo du aurkezpena Irungo Emakumeen Etxean, hilaren 13an, 18:30ean.
Bitaminako BAR #12 Bidasoa Art Room programan garatutako proiektua da aipatutakoa, eta artista madrildarrak bere ikerlanean zalantzan jarri ditu gorputz femeninoen eta horien dimentsio sinbolikoaren inguruko kontakizun bisual eta kontzeptualak euskal mitologiaren iruditerian, eta, batik bat, tradizionalki baztertu edota “deabrututako” figuretan sakondu du, sorginetan eta lamietan, kasu.
Aurkezpenean Helga Massetani Bitaminako sortzaile eta zuzendaria izango da; saioa Mikelarenak berak Emakumeen Etxean dinamizatzen duen Sorgin bat nola fabrikatzen den Jabekuntza Eskolako tailer trinkoaren atarikoa da. Hiru saiotan banatzen da ikastaroa, hilaren 15, 16 eta 17an 10:00etatik 13:00etara hurrenez hurren, eta bertan izena emateko epea hilaren 14an itxiko da.
