Abotsanitzen "kudeatzeko ezintasuna" salatu du EAJ-k
Kiroldegiko tabernak 500 egun darama hutsik, eta sauna gabe 250 egun daramatzate herritarrek. Hori dena udal gobernuaren kudeaketarengatik dela dio EAJ-k.
Kiroldegiko kafetegiaren egungo egoera. Udal gobernuan daramaten bi urteetan herriaren kudeaketa traketsa eta askotan ikusezina egitea leporatu dio EAj-k Abotsanitzi. Kiroldegia abiapuntu hartuz, jeltzaleen ustez udal gobernuak alde batera utzi ditu herritarren beharrak, eta beste gauza batzuk egiten aritu da. “Abotsanitzek polemika bihurtu du bere tresna politikoa. Akusazio bideoak egiten eta benetako kudeaketa ordezkatzen duten liburuxkak idazten aritu da”, azaldu du EAJ-k ohar bidez.
Kiroldegiko taberna duela 500 egun hustu zela adierazi du EAJ-k, eta era berean, saunak 250 egun daramatzala itxita. Horiek bera ez konpontzea leporatzen diote jeltzaleek udal gobernuari. “Oposizioan zeudenean irtenbide guztiak zituzten, eta gobernuan aldiz, arazoak konpontzeko gaitasuna ez da ikusten”.
Kiroldegiaz gain, EAJ-k aipatu du Abotsanitzek egindako hainbat promesa ez dituela bete. “Lehen, eguneroko eskakizunak zirenak, gaur egun isiltasun deserosoak dira”, adierazi du EAJ-k. Horren adibide moduan bidegorria aipatu dute adibidez, esanez oraindik udal gobernuak ez duela berririk eraiki. Etxebizitza politika berririk ez sustatzea ere leporatzen dio udal gobernuari, eta baita ere udal zerbitzuetan hobekuntzarik ez egitea.
Alderdi jeltzaleak azaldu du azken urteetan herrian egin diren obra guztiak haiek egindako lanetik abiatutakoak direla. Hala nola, San Nikolas zubi berria, Santiago kalea berritzea, arrantzale auzoaren berrurbanizazioa eta Muliaten egingo diren gizarte zerbitzuetarako bulego berriak. “Abotsanitzek ez du proiektu propio garrantzitsu bakar bat ere bultzatu. Hala ere, Gizarte Zerbitzuen alorretik bultzatutako proiektu batzuk aintzatetsi eta positiboki balioetsi nahi ditugu, hala nola doluan eta bakardadearen aurka laguntzeko programak. Herritarrentzat oso ekimen baliagarriak eta beharrezkoak direla uste dugu”.
“Hiri zikinagoa”
Espazio publikoaren kudeaketak ere okerrera egin du EAJren ustez. “Agerikoa da permisibitatea pankarta eta pintadekin. Udal-gobernuaren agindu berriek garbiketa-maiztasuna murriztu dute, hiriaren irudi axolagabeagoa eta zikinagoa eraginez”. Amaitzeko, EAJk gehitu du Abotsanitzek bakarrik gobernatzen duela, eta ez duela oposizioarekin ezertarako kontatzen.
