Irun 2040 plan estrategikoa diseinatzeari ekin diote
Epe luzerako proiektu bat da, eta XXI. mendeko Irunen oinarriak finkatuko ditu plan estrategikoak. Hasteko, hiriaren diagnostikoa egingo dute.
Irungo Udalak jakinarazi duenez, Irun 2040 Plan Estrategikoa diseinatzen hasi dira; epe luzerako proiektu bat da, eta zehaztu dutenez XXI. mendeko Irunen oinarriak finkatuko ditu. Proiektu horrek datozen urteetako lan ildoak identifikatuko ditu “sortzen diren erronkei aurre egiteko, sortzen diren aukerak aprobetxatzeko eta datozen hamarkadetan hiria definituko duten behar eta proiektuak antolatzeko”.
Azaldu dutenez, lehen pausoa enpresa espezializatu bat kontratatzea izango da hark hiriaren diagnostiko bat egin, helburu estrategikoak zehaztu ditzan eta jardun eremuak proposa ditzan. Era berean, herritarrek parte hartzeko plan bat jarriko dute martxan “haien ekarpenak funtsezkoak izango baitira dokumentu berria prestatzeko”.
Cristina Laborda, Irungo alkatea: “Biztanle gehiago ez ezik, zerbitzu publikoen, azpiegituren eta etxebizitzen eskari handiagoa eta mugikortasun eta jasangarritasun behar handiagoak izango ditugu, eta, egoera berri hau kudeatzeko, ezinbestekoa da estrategia argi bat izatea ikusteko norantz goazen, zer pauso eman behar ditugun eta zer bide orri izango dugun etorkizuneko erronkei aurre egiteko”.
Gauzak horrela, aipatu dute plan estrategiko berriak udalaren lehentasunak markatuko dituela, eta haren erabakiak bideratuko dituela 2040. urtera begira. Are, dagoeneko zerrendatu dituzte ardatz nagusiak zein izango diren: mugikortasun jasangarria, hiriaren eraldaketa, gizartearen kohesioa, berrikuntza ekonomikoa, etxebizitza, trantsizio energetikoa eta kultura. Bestalde, argi utzi nahi izan dute “hasierako planteamenduaren arabera, politika koordinatuak egin, baliabide egokiak jarri eta konpromiso sendoak” hartuko dituztela “ikuspuntu integral” batetik.
Horretaz gain, prozesua “zehatza eta plurala” izatea nahi dutenez, bertako zenbait entitatekin bilduko dira; “plana tresna eraginkorra izatea da asmoa, helburu neurgarriak eta epeak finkatzea eta etengabeko jarraipena egitea, betiere genero ikuspegia kontuan izanda”, gehitu dute.
Prozesuaren osagai nagusietako bat partaidetza plana izango da, eta, beraz, herritarrek, elkarteek, enpresek, gazte taldeek, adinekoen elkarteek eta kolektibo zaurgarriek ekarpenak egiteko aukera izango dute.
