Euskararen Eguna egunero izatea nahi dute
Euskararen Nazioarteko Eguna abenduaren 3an bada ere, Irundarrek gaiarekin lotutako zenbait jarduera izango dituzte abendura bitartean.
Josu Iguiñiz Irungo Udaleko Euskara zerbitzuko ordezkariak Euskararen Nazioarteko Egunaren bueltan antolatutako egitaraua aurkeztu du berriki Jantzi euskararen betaurrekoak lelopean. Izan ere, Euskararen Nazioarteko Eguna egun batean ospatu beharrean hiru hilabetez egingo dute “euskarari 365 egunez ikusgarritasuna emateko asmoz”. Gauzak horrela, egitarau bat ondu dute hilaren 10etik abenduaren 14ra bitartean.
Iguiñiz: “Aurtengo leloarekin aditzera eman nahi dugu Irungo pertsona gehienak, gaitasun handiagorekin edo txikiagoarekin, euskaraz hitz egiteko gai direla, baina horietako gutxik erabiltzen dutela egunero. Irundarrak animatu nahi ditugu betaurrekoak jantzi eta euskarazko hitz batekin hastea elkarrizketa “.
Aipatutako egitarauari, hasiera, hortaz, ostiralean (hilak 10) emango diote PausoK Dance dantza taldearen emanaldi batekin. Amaia KZn izango da berau, 19:00etan Hurrengo ekitaldia hilaren 25ean izango da, eta Benta Zaharreko Mutiko Alaiak arduratuko dira Irungo kaleetatik kantujira egiteaz, 12:00etatik aurrera.
Azaroari dagokionean, lehen jarduera hilaren 11n izango da, 18:00etan, eta bertaratzen direnek Irunero aldizkarian eta Txingudi Online hedabideetan argitaratuko duten elkarrizketa baten grabaketan egoteko aukera izango dute. Horretaz gain, hilaren 21ean, Jabier Muguruza eta Bernando Atxagak errezitaldia egingo dute Oiasso museoan, 19:00etan. Hurrengo egunean, berriz, Hitz Gurutzatuen Lehiaketa egingo dute Palmera Montero Gunean, 09:00etatik 14:00etara.
Azaroko ekintzak mota askotakoak izango dira, bizilagunek denetatik egiteko aukera izango baitute; horren adibide dira hilabete horretan egingo dituzten azken hiru jarduerak: liburu aurkezpena, erromeria eta antzezlana. Aipatutako liburua Iraganaren lekuko. Euskal Herriaren historia liburua da, eta CBAn egingo dute haren aurkezpena Iñaki Lopez de Luzuriagak eta liburuaren egileetako batek. Hilaren 29an, berriz, Auntxa Triki Eskolak egingo du erromeria, 12:00etan, Zabaltza plazan. Eta, azaroari amaiera emateko Badakizu plastikozko loreak ez direla inoiz bizi izan, ezta? antzezlana egingo dute Amaia KZn Mireia Gabilondo, Aitziber Garmendia eta Telmo Iruretak.
Ekintza nagusia, alabaina, abenduaren 3an izango da, egun horretan baita Euskararen Nazioarteko Eguna. Zehazki, egun horretako 10:00etan hasita, ihes gela egingo dute Oiasso museoan euskaltegiko ikasleek. Era berean, abenduaren 5ean Zirika Zirkus konpainiak Marietak Zirkus antzerkia eta zirkua uztartzen dituen ikuskizuna egingo du.
Abenduan, bestalde, kantujira, diana, eta Karmele zein Ombuaren itzala filmak ikusteko aukera izango dute irundarrek Amaia KZ eta Oiasson.
Amaia KZ zein Oiasso museoan egingo dituzten jarduera guztiak doan izango dira, baina gonbidapenak lortu behar dira aurrez udalaren webgunean edota museoan bertan. Oiasso museoa 10:00-14:00 artean egoten da zabalik asteartetik igandera, eta 16:00-19:00 artean berriz, ostiral eta larunbatetan.
