Berotegi efektuko gasen isurketa %45 murriztu da 15 urtean
Datua Klima eta Energia Iraunkorrerako Ekintza Planaren 2022-2030 txostenean argitaratu dute, eta gaur eman du horren berri Irungo Udalak.
Irunek %45 murriztu du berotegi efektuko gasen isurketa 15 urtean. Hala jakinarazi dute gaur Klima eta Energia Iraunkorrerako Ekintza Planaren 2022-2030 txostenean. Irunen kasuan, zehazki, 2007. urtean 319.000 tona karbono dioxido baino gehiago izatetik 2023an 175.000 tona izatera igaro dira, eta “horrek berretsi egiten du energia eraginkortasunera, mugikortasun iraunkorrera eta etorkizuneko ingurumen erronkei aurre egiteko hiri eredu prestatuago baten aldeko apustua egitera bideratutako udal politiken egokitasuna”.
Borja Olazaba, Garapen Jasangarriko ordezkaria: “Udal honek hiri bizigarri bat eraikitzen jarraitzeko duen konpromisoa irmoa da. Berotegi efektuko gasen emisioa murrizteko abian jarritako jarduerak arrakasta handia izaten ari dira. Ildo horretan lanean jarraituko dugu, pertsonak eta haien osasuna lehenetsiz, garraio publikoaren erabilera bultzatzen dugun bitartean eta herrritarrak kontzientziatzen jarraitzen dugun bitartean gure ingurunea ikuspuntu jasangarri eta errespetuzko batetik zaintzearen garrantziaz”.
Udaletik nabarmendu dutenez, planaren ebaluzioan garraioa nabarmentzen da hiriko berotegi efektuko gasen isurketen eragilen nagusi gisa. Eta, horren aureran Irungo Udalak 28 arintze neurri prestatu zituen bost ildo estrategikorekin. Horietan 9,6 milioi euro inbertitu dituzte 2023 eta 2024an: energia eraginkortasuna, energia berriztagarria, mugikortasuna, hondakinak eta xurgapen potentziala. Gaur gaurkoz, neurrien %68 hastear edota hasita daude. Alabaina, mugikortasunaren sektoreak bi neurri ditu azken fasean: hiriko garraio publikorako erregai alternatiboen erabilera eta Etxolazarreta finkaren zaharberritze ekologikoaren proiektua.
Azken bi urteetan Klima eta Energia Iraunkorrerako Ekintza Planaren barruan egindako jarduera garrantzitsuenei dagokienez, Irunbuseko flotari zuzendutako zazpi milioi euro baino gehiago nabarmentzen dituzte. Bestalde, udaletik zenbait inbertsio aipatu dituzte: Azken Portu kiroldegian autokontsumorako instalazio fotovoltaiko bat egitea, hiriko zenbait guneetako argiteria publikoa berritzea eta Sancho eta Urdanibia ospitaleko estalkia hobetzeko obrak, kasu.
Gainera, egokitzapen neurri batzuk daude lau ildo estrategiko dituztenak, eta horietan ia 1,2 milioi euro inbertitu dituzte 2023. eta 2024. urteetan. Atal horrek 18 neurri ditu, eta %61 hasita daude. Kasu horretan, uraren gaineko presioa murriztea eta baliabideari dagokionez hiriaren kalteberatasuna minimizatzea, natura ingurunea klima aldaketaren ondorio potentzialetara egokitzea, ingurumenaren eta haren erronka klimatikoen gaineko ezagutza sustatzea eta herritarrak beren osasuna eta segurtasuna arriskuan jartzen dituzten klima baldintzetatik babesteko zuzeneko jarduerak egitea nabarmendu dute.
