'Dolua denoi dagokigu' hitzaldia, hilaren 8an
Dolua ulertu, lagundu eta sendatzeko gakoak eskainiko dituzte Oihane Garamendi eta Nicole Bumiller adituek.
Duela urtebete aurkeztu zuten dolu laguntza programa. Hondarribiko Udalak duen dolu laguntza programak urte bat beteko du. “Urtea borobiltzeko” Dolua denoi dagokigu: ulertu, lagundu eta sendatu hitzaldia antolatu dute.
Oihane Garamendi eta Nicole Bumiller adituek eskainiko dute saioa. Hilaren 8an izango da, Kultur Etxean, 18:00etatik 19:00etara. Hitzaldia gaztelaniaz izango den arren aurkezpena euskaraz proiektatuko da, eta galderak euskaraz zein gaztelaniaz erantzungo dituzte.
Udalak azaldu duenez, Hondarribia da Euskal Autonomia Erkidegoan doluari buruzko laguntza psikologikoa eskaintzen duen udalerri bakarra.
Programa pilotua martxan jarri zenetik “oso harrera ona” izan duela nabarmendu du Josu Peña zinegotziak: “Argi geratu da hitz egiteko, partekatzeko eta entzunak izateko premia handia dagoela. Udalak bide horretan segitzeko apustu irmoa egingo du. Aurten izandako arrakasta ikusita, zerbitzua datorren urtean ere mantenduko dugu”.
Dolu laguntza zerbitzua eskatzeko udalaren webgunean edo gizarte zerbitzuan egin behar dira izapideak. Herritarrek hamar saioko laguntza jasoko dute. Izena eman ondoren, psikologoa jarriko da interesdunarekin harremanetan hitzordua finkatzeko. Jakinarazi dutenez, laguntza jasotzeko beharrezkoa da Hondarribian erroldatuta egotea.
