'Haurrak parkean' egitasmoari ekingo diote berriz
Zortzi saio egingo dituzte orotara, eta lehena urriaren 1ean izango da, Nagore Laffage parkean. Euria eginez gero Toki Alai HHko patioan egingo dute.
Irungo Udaleko Euskara Zerbitzuak jakinarazi duenez, Haurrak parkean programari helduko diote berriz, eta datozen asteetan hasiko dira. Kale eta parkeetan euskararen erabilera handitzea da jardueraren helburua, eta zehazki urrian hasiko dira berriz horrekin. Orotara zortzi saio egingo dituzte, eta datorren hilabeteko asteazken eta ostiraletan egingo dituzte.
Hezten enpresako hezitzaileak arduratuko dira haurrekin euskaraz jolasteaz; urriaren 1, 8, 15 eta 22an Nagore Laffage parkean elkartuko dira, eta Oinaurreko parkean egingo dituzte asteazkeneko saioak. Bestalde, Olaketa kaleko parkean eta San Juan plazan egingo dituzte ostiraleko saioak (urriak 3, 10, 17 eta 24).
Euria eginez gero Nagore Laffage parkean egitekoak ziren hitzorduak Toki Alai HHk patio estalian egingo dituzte, Oinaurreko parkekoak bertako aterpean eta Olaketa kaleko zein San Juan plazakoak udaletxeko arkupeetan.
Adinaren arabera banatuko dituzte taldeak:
- Zabu-Zibu: 3-5 urte (helduekin). 17:00etan.
- Txirrintxon: 6-9 urte. 18:00etan.
Urtean hiru txanda antolatzen dituzte, urrian, martxoan eta maiatzean hurrenez hurren.
