Emakumeen Errugbi Eguna ospatuko du Txingudi Errugbi Klubak
Emakumeen taldeari bultzada bat emateko helburua du aurten Txingudi Errugbi klubak. Asteburu honetako hitzordua "mugarri" izatea nahi dute.
Emakumezkoen taldeak Valladolideko El Salvadorrekin aurten egindako entrenamendua bat.Txingudi EK Larunbat honetarako Emakumeen Errugbi Eguna antolatu du Txingudik Errugbi Klubak. Errugbi jokoak, opariak, hirugarren denbora eta senior taldearen lagunartekoa egingo dituzte, helburu sendo batekin: emakumeen harrobia sendotzea.
Goizeko 11:00etan hasiko dute eguna. Entrenamendu saio berezia antolatuko dute, gerturatzen diren neskak elkar ezagutu eta errugbiarekin lehen kontaktua izan dezaten. 12:00ak aldera beroketak egin eta beren arteko “tokata” txapelketatxoa jokatuko dute. Klubetik esan dutenez modalitate honetan ez dago plakajerik eta baloia azkarrago mugitu behar da defentsan zuloak aurkitzeko.
Partida amaitutakoan, 14:00ak aldera, hirugarren denbora egingo dute, eta jaki goxoak dastatu ondoren, parte hartu izanagatik soilik opariak jasoko dituzte. Horren ondoren Biok Txingudiren eta Zaragozako Ibero taldearen arteko lagunartekoa jokatuko dute.
Kluba jakinarazi duenez, aurten apustu sendoa egin nahi dute emakumezkoen senior taldea indartzeko. “Urteak eman ditugu ahaleginetan emakumezkoen senior taldea atera nahian eta gure momentua duela hiru denboraldi iritsi zen. Orain, talde honek harrobia behar du eta horretan ari gara”, azaldu du Xabi Sanchez zuzendaritzako kideak.
Aurten neskei zuzendutako eskaintza berria jaso du klubak harrobiko proiektua garatzeko. Astelehenetan 18:00etatik 19:00etara neskei bideratutako entrenamenduak egingo dituzte, plakajerik gabeko modalitatea praktikatuz. Horrek, kirola ezagutzen ez duten emakumeei sarbidea erraztea espero dute.
Denboraldiaurrea
Oraindik denboraldia hasteko zenbait egun geratzen diren arren, denboraldi aurreko partidak jokatuko dituzte klubeko 16 eta 18 urte azpiko taldeek. Biek ala biek Hernanin jokatuko dute larunbatean.
Aldi berean, gizonen senior taldeak Mutriku eta Zaragoza Ibero taldeen kontra jokatuko du Plaiaundin bertan. Partidua 16:00etan hasiko da. Taldea konfiantzaz beteta dago. Izan ere, joan den astean Uribealdearen kontra lehiatu ziren eta partidua sentsazio onekin amaitu zuten.
Igandean, Bera Bera eta Zarautz/Beltzak taldeen bixita jasoko du 14 urte azpiko taldeak. Partida goizeko 11:00etan hasiko da.
