Gipuzkoako Outlet Azoka eta askoz gehiago, Ficoban
Datozen sei asteetan askotariko hitzorduen topaleku izango da Ficoba. Kongresuak, azokak, azterketak... egingo dituzte bertan.
Datozen asteetan ehunka pertsona igaroko dira Ficobatik, sei astetan zehar hamaika ekitaldi izango baitira Irungo eremu erraldoi horretan. Horien artean aurkitzen dira azokak, kongresuak, azterketak…
Ekitaldi horietan lehena hilaren 26tik 28ra izango da, Gipuzkoako Outlet Azoka egingo baitute bertan. 60 postu baino gehiago jarriko dituzte, eta moda, oinetakoak, osagarriak, kirol arropa, etxea eta atsedena bezalako arloak izango dira nagusi. Azoka horretako sarrera bi eurokoa da; 12 urtetik beherakoak doan sartuko dira.
Hurrengo ekitaldia Los Muñecos de la Tarta – IX. Ezkontza Azoka izango da, urriaren 18 eta 19an hain justu. Lehenengoz egingo dute pabiloien eremuan (lehenengo pabiloia), eta bertan bikoteek euren eguna antolatzeko behar dutena aurkituko dute, hala nola jatetxea, argazkigintza, bitxigintza, makillajea, gonbidapenak, dekorazioa eta ezkontza joerak.
Era berean, urriaren 25 eta 26an Antzinako Objektu, Bilduma eta Vintage Azoka egingo dute. Lehenengoz egingo dute ekitaldia Ficoban eta zenbait motatako pizak jarriko dituzte bertan: altzariak, bitxiak, arropa vintagea, numismatika, zigiluak, panpina zaharrak… Hitzordu hori Ficobako bigarren pabiloian izango da.
Azoka eta erakusketez gain, kongresuak eta topaketak ere egingo dituzte bertan. Horien adibide da urriaren 9an egingo duten Gipuzkoa IndustrySec-en topaketa. ZIUR (Gipuzkoako Zibersegurtasun Industrialdeko Zentroa) eta Gipuzkoako Foru Aldundiak antolatu dute ekitaldia, eta adimen artifizialaren erronkak eta aukerak zibersegurtasunean, NIS2 Europako zuzentaraua eta industria inguruneko kasu praktikoak bezalako gaiak jorratuko dituzte.
Bestalde, Ikasenpresa Kongresua egingo dute urriaren 21ean, eta hori Lanbide Heziketako ikasleei zuzendutako jardunaldia izango da. Bi egun geroago, urriaren 23an, alegia, Bidasoa Activak bultzatutako Enplegu Azoka egingo dute.
Hots, HABEren euskara mailak egiaztatzeko azterketak ere egingo dituzte Ficoban urriaren 3 eta 4an.
Ekitaldien zerrenda horretan azkena Gureak-ena da; izan ere, 50. urteurrena osaptuko dute bertan urriaren 31n.
