Garapenerako Gobernuz Kanpoko Erakundeen azoka, igandean
Hilaren 28an izango da, 11:00etatik 13:30era, Colon ibilbidean. Hamazazpi elkartek egiten duten lana ezagutzeko aukera izango da.
Gorka Alvarez Irungo Udaleko Giza Eskubideetarako, Memoria Demokratikorako eta Lankidetzarako ordezkariak udalak garapenerako lankidetza proiektuetarako emango dituen diru laguntzak aurkeztu ditu. Agerraldian, Alvarezekin izan dira Maria Serrano, Erika Gomez eta Trini Fernandez; Behar Bidasoa, Chiapas Enea eta Tadamum elkarteetako ordezkariak dira aipatutako hiruak.
Prentsaurrekoan azaldu dutenez, Irungo Udalak 504.721,00 euro banatuko ditu bi diru laguntza moten bidez: batetik, jakinarazi dute 283.766,00 euro emango dizkiela Euskal Fondoari eta Behar Bidasoa, Denok Osasunaren Alde, Proyde-Proega, Tadamun eta Taupak elkarteei. Hots, diru laguntza izendunen bidez, 220.955,00 euro banatuko ditu deialdi ireki bidez. Orotara 21 eskaera aurkeztu dira deialdira, eta honako elkarteek jasoko dute laguntza: Derandein Fundazioa, TAU Fundazioa, Gipuzkoako Óscar Romero Solidaritza Batzordea, Emigrados Sin Fronteras, Chiapas Enea, Manos Unidas, Adeco, Haurralde Fundazioa, Agua de Coco Fundazioa, Garabide, Enraíza Derechos, BLB, FISC Fundazioa, Nazioarteko Elkartasuna, Asociación Jorge Adolfo Freytter Romero eta ICLI Ingeniería para la Cooperación. Elkarte horiek Kolonbian, Bolivian, El Salvadorren, Guatemalan, Senegalen, Madagaskarren, Mexikon eta Kenyan egingo dute lan.
Xehetasun horiez gain, Alvarezek aurreratu du igande honetan (hilak 28) Garapenerako Gobernuz Kanpoko Erakundeen Azoka egingo dutela Colon ibilbidean, 11:00etatik 13:30era. Bertan hiriko eta beste udalerri batzuetako hamazazpi elkartek garapenerako lankidetzaren, giza eskubideen defentsaren eta garapenerako heziketaren esparruan egiten duten lana ezagutzeko aukera izango da.
