Udal antzerki tailerretan izena emateko epea zabaldu da
11-17 urte bitarteko nerabeei eta 18-29 urte bitarteko gazteei zuzenduriko tailerrak eskaini dituzte. Urtero bezala, Mikel Sarriegi antzezle eta antzerki zuzendari hondarribiarrak gidatuko ditu saioak.
Joan den ikasturtean landutako antzezlanaren emanaldia Kultur Etxean. Hondarribiko Udaleko Gazteria sailak 11-17 urte bitarteko nerabeei eta 18-30 urte bitarteko gazteei zuzenduriko antzerki tailerrak eskainiko ditu 2025-26 ikasturtean. Nerabeen antzerki tailerrak dagoeneko sei urteko ibilbidea du, eta aurtengoa bigarren urtea izango da gazteei zuzenduriko taldea eskaintzen dena. Saio horiek guztiak, Mikel Sarriegi antzezle eta Astrolabium konpainiako zuzendari hondarribiarrak eskainiko ditu.
Antzerki saioetan ondo pasatzeaz gain, gorputz adierazpena, emozioen kudeaketa, interpretazioa, jendaurreko komunikazioa, ahotsaren proiekzioa, presentzia eszenikoa eta talde lana landuko dituzte. “Helburua ez da inoiz izugarrizko aktore onak sortzea edo Hollywood-en antzezteko ametsa sortzea, baizik eta jolasen bidez antzerkiaren munduan hastapenak egitea”, esan du Sarriegik.
Nerabeei zuzenduriko saioak asteazkenetan izango dira, gazteei zuzendurikoak, aldiz, asteartetan. Hori bai, bi hitzorduak leku eta ordu berean izango dira. Hau da, Talaia eskolako Biteri eraikinean egingo dira, 18:00etatik 20:00etara. Zenbaitetan, Kultur Etxeko agertokian entseatzeko aukera ere izango dute aktoreek.
11-17 urtekoek datorren asteazkenean izango dute ikasturteko lehen saioa, urriaren 1ean zehazki. Gazteek, aldiz, astebete itxaron beharko dute. Saioak urriaren 7an hasiko dituzte. Saioak euskaraz izango dira.
Tailer bakoitzean gehienez hamabi lagunentzako tokia dago. Urteko kuota 175 eurokoa da eta herrian erroldatuak dauden pertsonek lehentasuna izango dute. Izen emateak www.hondarribia.eus-en edota Gazteen Zerbitzuan (Javier Ugarte 6) egin beharko dira urriaren 1a baino lehen.
