Mintzapraktika saioak bueltan dira
Euskara praktikatzeko saioetan izena emateko epea irekia dago jada. Astean behin izan ohi dira saioak.
Ikasturte honetako mintzapraktika saioak berrabiatu dituzte Hondarribian. Saioen funtzionamendu “sinplea” azaldu dute: “euskara praktikatu nahi duen lagun talde bat elkartzen da, astean ordu batez, euskaraz aritzeko prest dagoen pertsona batekin”. Horiek dira, beraz, mintzapraktika saioetako bi protagonistak: euskaraz praktikatu nahi duena eta eta euskaraz hitz egiteko prest dagoena.
Gainera, euskara praktikatzea gainerako zaletasunekin elkartzerakoan “emaitza ikaragarria da!”. Hala, beti ere euskara erdigunean izanik, zenbait talde sortu dituzte Hondarribian: mendi taldea, kakorratz taldea, rol jokoetan aritzen den taldea, mus taldea, hitano taldea edota irakurketa erraza taldea. Horrez gain, mintzapraktika taldeetatik at ere, herriko euskarazko jardueretan parte hartzen dute saioetako kideek: antzerkian, kontzertuetan, hitzaldietan, eta abar.
Mintzapraktikaren “malgutasuna” azpimarratu dute, “eskaintzen dituen aukerak amaigabeak baitira”. Gauzak horrela, “euskaraz bizi nahi duen pertsona orori horretarako tartea eta aukera eskaintzen dizkio, bere beharrizan, egoera eta interesetara egokituz”.
Hori dela eta, beren denbora “musu-truk” ematen duten guzti horiek eskertu nahi izan dituzte, “benetako aktibista linguistikoak” baitira, eta “euskararen biziberritzea prozesuari ekarpen garrantzitsua” egiten baitiote. Horregatik, izen emateak ireki berri dituzten honetan, “euskaltzale den eta euskara egunerokotasunean” erabiltzen duen edonor” Mintzalaguna egitasmora hurbiltzera gonbidatu dute.
Beraz, Taupa mugimenduaren edo Hondarribiko Udalaren webgunearen bidez, mintzalaguna@hondarribia.eus helbidera idatziz, 688 86 53 98 telefonora deituz edo Hondarribiko Udal Euskaltegira joz eman daiteke izena.
