Maddalen Arte Guneko komisarioa izateko hautagaitza deialdia zabalik
Datorren urteko arte guneko erakusketa egitaraurako komisarioa hautatzeko deialdia zabaldu du udalak, eta abenduaren 1era arte aurkeztu daitezke hautagaitzak.
2026an Maddalen Arte Guneak erakusketa egitarau oparoa izateko lanean da dagoeneko Hondarribiko Udala, eta norabide horretan ireki du komisario izateko hautagaitza bidaltzeko deialdia. Aukeratutakoak lau erakusketa antolatu beharko ditu, hiru kolektibo eta bakarkako bat, eta Hondarribia Sormen Hiria bekaren bi artista onuradunen bakarkako erakusketetan “aholku eta gainbegiratze lanak” egin beharko ditu.
Tokiko komisarioei zuzendutako deialdira bakarka nahiz taldeka aurkez daiteke. Taldeka aurkeztekotan, ordea, ordezkari bat hautatu beharko dute, eta komisarioek ezingo dute erakusketetan artista moduan parte hartu.
“Maddalen Arte Gunea etengabeko sormenaren eta tokiko talentuaren erakusleiho bihurtu dutela” nabarmendu du Ortzi Alonsok, Kultur zinegotziak. Hori dela eta, urtero kudeatzaile-programatzaile berriak aukeratzeak “freskotasuna eta ikuspegi berriak” ematen dituela iruditzen zaio.
Hala, abenduaren lehenaren aurretik curriculuma eta proiektuaren dosierra aurkeztu behar dira Hondarribiko Udalaren webgunearen edo Biztanlearen Arreta Zerbitzuaren bidez. Udalak jakinarazi duenez, arte bisualetan adituak diren pertsonek osatuko dute epaimahaia, eta hiru irizpide nagusi izango dituzte kontuan: “kalitate artistikoa, bideragarritasuna eta originaltasuna”.
