Txiki eta Otaegiren erailketaren urteurren ekitaldirako autobusa Bidasotik
Hilaren 27an egingo du Sortuk Iruñeko Anaitasunan. Hondarribia eta Irunetik autobusa aterako da.
50 urte beteko dira hilaren 27an erregimen frankistak Angel Otaegi eta Juan Paredes Manot Txiki fusilatu zituenetik. Bidasoko ezker abertzaleak zehaztu duenez, “diktadura frankistaren aurka borroka egin zuten bi gazte abertzale akabatzeaz gain, Euskal Herriaren askatasun egarria itotzea ere bazuten helburu; ordez, ez zuten lortu”.
Mende erdia igaro den honetan, ekitaldi nazionala antolatu du Sortuk hilaren 27an bertan Iruñeko Anaitasunan, 17:30ean. Izan ere, “1975eko gertakari haien memoriak eta orbainek oraindik bizi-bizirik diraute”, eta hala erakutsiko dute Nafarroako hiriburuan. “Herri hau altxarazi eta itxaropena ekarri zuen belaunaldi haren askatasun egarria ere bizi-bizirik da. Hala iritsi da guganaino hamarkadaz hamarkada. Euskal Herria askatzera lotu gara milaka herritar, eskuz esku herri hobe bat eraikitzeko ametsera batuz”.
“Euskal Herriaren askatasun grinak bizirik eta indartsu jarraitzen duela” adierazteko, jende andana aurreikusten dute ekitaldirako. Gauzak horrela, Bidasoko zenbait herritar ere bertan izango dira. Hain zuzen, autobusa antolatu dute eskualdeko ezker abertzaleko kideek Hondarribia eta Irunetik. 15:00etan abiatuko da Hondarribiko Sabin Aranako autobus geltokitik, eta 15:15ean Irungo Bixeratik. Ekitaldian parte hartzeko ez da izenik eman behar; autobuserako, ordea, 677 18 74 62 telefono zenbakira Whatsapp edo Telegram mezua bidali behar da.
