Palestinaren aldeko 'Ibaitik itsasora' ibilaldia bihar iritsiko da Irunera
Tuteran hasi zen ibilaldia, Ebro ibaian, eta 10. etapa Irunen amaituko da. Manifestazioa era izango da bihar, eta etzi Hendaiara abiatuko da.
CAF lantegiaren aurrean apirilean egindako elkarteratzea. Ebro ibaian hasi zen Ibaitik itsasora martxa, eta asteburuan amaituko da, Txingudiko badian. Hendaian amaituko da larunbatean, baina lehenago, Irundik pasako da. Bihar iritsiko da martxa Irunera, 10. etapa eginez, eta larunbatean Bidasoa ibaia zeharkatuko du, Hendaiarantz.
Bihar, 09:30ean hasiko da martxa, Beran. Beratik, Bidasoako bide berdea hartuko dute, eta aurrera joanda, Irunera iritsiko dira. Aurreikusten dutenez, 12:30ean Irunen sortutako taldearekin elkartuko dira, eta 13:30ean harrera egingo zaie San Juan plazan, udaletxearen parean. Ondoren, Mosku plazaren inguruetan bazkalduko dute.
Ibaitik itsasora martxaren helburuetako bat Israelekin harremana duten euskal enpresak azaleratzea da, bertan elkarteratzeak eginez. Horregatik, bihar, 17:00etan hasita, manifestazio bat egingo dute bertaratutakoek, San Juan plazatik CAF enpresaraino. 18:00etan iritsiko dira CAFera, eta bertan elkarteratzea egin ondoren, hainbat ekintza izango dira La Kaxita gaztetxean.
Larunbatean, azkena
11. eta azken etapa izango da larunbatekoa. 09:30ean ongi etorria egingo zaio ibilbideari Abenida zubian. Horrez gain, mugari buruz solastuko dira bertan. Ondoren, 10:45ean, elkarteratzea egingo dute, Carrefour merkataritza dendaren parean, salaketa moduan. Azkenean, 13:00etan Sokoburura iritsiko da ibilaldia, hau da, itsasora, bere amaierara. Bertan hitza hartuko dute. Baina eguna ez da bertan amaituko.
Ondoren, arratsaldean, hainbat ekitaldi izango dira. Sabri Giroud idazle eta aktibistak bere liburu Palestina 50 potretetan ardatz hartuta hitzaldi bat emango du. Antzerkiak hartuko du lekukoa ondoren, Terre promese antzezlan tragiko komedia oholtzaratuko dute. Azkenik, bertsolariek eta Xiberoots talde zuberotarrak itxiko dute eguna.
