Abotsanitzen deia: "Uste duguna baino hurbilago gaude, lan egin dezagun batera!"
Jaien balorazioa helarazi du Abotsanitzek, eta Alardean tentsioa sortzeko jarrerak egon baldin baziren ere, herritarrek "lasaitasunez" erantzun zietela nabarmendu du. Alkate dekretuaren aurka HAOSEk ezarritako helegitearen jarraipena egingo du.
EAJk eta Hondarribiko Udalak egin ondoren, Abotsanitzi iritsi zaio jaien balorazioa egiteko txanda. Gauzak horrela, “udaleko teknikari eta langile, herriko eragile eta elkarteentzako” izan dira lehen hitzak, horien “lana goraipatzeko”: “Jarduera eta ekitaldietan lanean aritu zareten guztien lana txalotzen dugu; beti aldarrikatu dugun bezala, horrela egiten da herria!”.
Aurten ere, egitaraua kolektibo gehiagorengana hurbiltzeko lan egin dela azpimarratu du herri plataformak. Besteak beste, “mugikortasun urriko pertsonentzako lehentasun espazioak baimendu dira ekitaldi jakin batzuetan”, barraketan egun herrikoiak eta zaratarik gabeko orduan egon dira edota Gazte Kanttuaren moduko egitarauek tokia izan dute.
Hala ere, bi indarkeria matxista kasuren berri izan du, eta eraso horiek “irmoki salatu” nahi izan ditu. Jaietan zehar Emaginekin elkarlanean puntu morea izan da.
Alardeaz
Baina, Alardeak ere eman du zer esana. Izan ere, batzuek “tentsioa eta beldurra” sortu nahi izan baldin badute ere, “herritarrek lasaitasunez eta soseguz” erantzun diete: “Herritarrek erakutsi dute ez daudela konfrontaziorako, nahiz eta batzuek hori bilatu”.
Bestetik, alkate dekretua “jo puntuan” egon dela iruditu zaio Abotsanitzi. Udalak “konpainiek beraien ordutegi, espazio eta ibilbideak modu seguruan” egiteko erantzukizuna hartu duela adierazi du plataformak, “dagokion bezala”. Haatik, HAOSEk dekretuari aurre egin eta helegitea aurkeztu zuen, baita “kudeaketa hau inposizio bezala saldu” ere. Abotsanitzek helegitearen jarraipena egingo du, “epai-bidea ez baita amaitu”. Halaber, HAOSEri “prozesu judizialaren inguruko komunikazio zintzo eta gardena egin dezan” eskatu dio.
Gainera, Udalak “berdintasun legeak egozten dion eginkizunarekin betetzeko” emakumeen eskubideak zabaltzeko lan egin duela ziurtatu du. Hori dela eta, “Jaizkibel konpainiari espazioak irekitzen jarraitu du”.
Azkenik, elkarlanean aritzeko deialdiarekin bukatu du balorazioa: “Adierazi nahi dugu ez dela egia elkarrezinak garela. Nahiz eta batzuek saiaketa etengabea egiten duten herritarren arteko zatiketa sustatzen, gauza gehiagok elkartzen gaituzte. Uste duguna baino hurbilago gaude, maitasun berak batzen gaitu. Lan egin dezagun batera!”.
